Toshkent, O’zbekiston (UzDaily.uz) — O‘zbekistonning Novosibirsk shahridagi Bosh konsulxonasi mamlakat fuqarosiga bir yoshu bir oylik farzandi bilan qayta birlashishda yordam berdi. Bola mahalliy go‘daklar uyida bo‘lgan. Bu haqda “Dunyo” axborot agentligi xabar berdi.
Mavjud maʼlumotlarga ko‘ra, bolaning onasi Rossiya migratsiya qonunchiligini buzgani sababli Novosibirskdagi xorijiy fuqarolarni vaqtincha saqlash markaziga joylashtirilgan.
Bosh konsulxona xodimlari bir kun davomida markaz va go‘daklar uyi rahbariyati bilan muzokaralar olib bordi.
Natijada fuqaro ozod qilindi, uning O‘zbekistonga qaytishi uchun esa shoshilinch tartibda sertifikat rasmiylashtirildi.
Shundan so‘ng bola Tolmachyovo xalqaro aeroportiga olib kelindi va u yerda onasi bilan uchrashdi.
Bosh konsulxona maʼlum qilishicha, so‘nggi yetti kun ichida diplomatik vakolatxona yana bir yoshdan 12 yoshgacha bo‘lgan besh nafar bolaning O‘zbekistonga qaytarilishini tashkil etgan.
Ular orasida nogironligi bo‘lgan bolalar ham bor.
