O‘zbekiston va Suriya o‘rtasida ishbilarmonlik aloqalari kengaytiriladi
Toshkent, O’zbekiston (UzDaily.uz) — Damashqda Suriya Savdo palatalari uyushmasi va Suriya iqtisodiyotining turli tarmoqlarida faoliyat yuritayotgan 20 ga yaqin kompaniya vakillari ishtirokida uchrashuv bo‘lib o‘tdi. Tomonlar savdo-iqtisodiy aloqalarni rivojlantirish va Buxoroda bo‘lib o‘tgan O‘zbekiston — Suriya biznes-forumida avval erishilgan kelishuvlarni amalga oshirish masalalarini muhokama qildi. Bu haqda “Dunyo” AA xabar berdi.
Muzokaralar ikki mamlakat tadbirkorlari o‘rtasida fevral oyida boshlangan muloqotning davomi bo‘ldi. Ishtirokchilar to‘g‘ridan-to‘g‘ri hamkorlikni kengaytirish va aniq qo‘shma loyihalarni amalga oshirish imkoniyatlarini ko‘rib chiqdi.
Uchrashuvda oziq-ovqat sanoati, qurilish materiallari ishlab chiqarish, elektrotexnika va yengil sanoat sohalariga alohida eʼtibor qaratildi. Tomonlar ushbu va boshqa istiqbolli yo‘nalishlarda to‘g‘ridan-to‘g‘ri ishbilarmonlik aloqalarini o‘rnatish masalasini muhokama qildi.
Suriyalik tadbirkorlar mamlakatdagi tiklash jarayonlari bilan bog‘liq holda qurilish materiallariga talab yuqori ekanini taʼkidladi. Shu munosabat bilan ular O‘zbekistonning qurilish va developerlik kompaniyalari bilan hamkorlik qilishga qiziqish bildirdi.
Elektrotexnika va yengil sanoat mahsulotlari savdosini kengaytirish masalasi ham muhokama qilindi.
Halab shahridagi O‘zbekiston Savdo uyining imkoniyatlariga ham alohida eʼtibor qaratildi. Tomonlar undan ikki tomonlama savdoni rivojlantirish, shuningdek, Suriyaning boshqa hududlarida shunga o‘xshash savdo maydonchalarini tashkil etish uchun foydalanish istiqbollarini ko‘rib chiqdi.
Suriyalik tadbirkorlar Toshkentda kuzda O‘zbekiston — Suriya savdo-iqtisodiy hamkorlik bo‘yicha hukumatlararo qo‘mitasining birinchi yig‘ilishi doirasida o‘tkazilishi rejalashtirilayotgan biznes-forumda ishtirok etishga taklif qilindi.
Uchrashuv yakunlari bo‘yicha tomonlar biznes vakillari o‘rtasida to‘g‘ridan-to‘g‘ri aloqalarni muntazam ravishda qo‘llab-quvvatlash, o‘zaro ishbilarmonlik missiyalarini tashkil etish hamda ikki mamlakat kompaniyalarining xalqaro ko‘rgazma va yarmarkalarda ishtirokini kengaytirishga kelishib oldi.
Bundan tashqari, tomonlar aniq savdo va investitsiya loyihalari ustidagi ishlarni faollashtirish niyatini bildirdi.
