O‘zbekistonning BAAdagi elchisi BAA prezidentiga ishonch yorliqlarini topshirdi
Toshkent, O’zbekiston (UzDaily.uz) — O‘zbekistonning Birlashgan Arab Amirliklaridagi elchisi Umid Shodiyev mamlakat prezidenti Shayx Muhammad bin Zoid Ol Nahayonga ishonch yorliqlarini topshirdi. Marosim Abu-Dabidagi rasmiy «Qasr Al-Vatan» qarorgohida bo‘lib o‘tdi. Bu haqda “Dunyo” AA xabar berdi.
Uchrashuv davomida BAA prezidenti ikki tomonlama munosabatlarning bugungi holatini yuqori baholadi va Umid Shodiyevga diplomatik faoliyatida muvaffaqiyat tiladi. Savdo-iqtisodiy, investitsiyaviy va turizm sohalaridagi hamkorlikni yana-da rivojlantirishga alohida eʼtibor qaratildi.
Amirliklar tomoni O‘zbekistonning yangi elchisiga o‘z diplomatik missiyasini samarali amalga oshirishi uchun zarur sharoitlarni yaratishga tayyorligini bildirdi.
O‘z navbatida, Umid Shodiyev Shayx Muhammad bin Zoid Ol Nahayonga O‘zbekiston Prezidenti Shavkat Mirziyoyev nomidan samimiy salom va hurmat-ehtiromini yetkazdi.
Elchi ikki davlat rahbarlarining siyosiy irodasi tufayli O‘zbekiston va Amirliklar o‘rtasidagi munosabatlar yuqori darajada sifat jihatidan yangi bosqichga chiqqanini taʼkidladi. Shuningdek, u O‘zbekiston va BAA o‘rtasidagi strategik sheriklikni yana-da kengaytirish uchun barcha saʼy-harakatlarni amalga oshirishga tayyorligini bildirdi.
Umid Shodiyev 2022–2025 yillarda O‘zbekistonning BAAdagi elchixonasiga rahbarlik qilgan Abdulaziz Akkulovning o‘rnini egalladi. 2025 yil dekabr oyida Akkulov O‘zbekiston Turizm qo‘mitasi raisi etib tayinlangan.
Avvalroq BAA Tashqi ishlar vazirligi Umid Shodiyevning ishonch yorliqlari nusxalarini 2026 yil aprel oyida qabul qilgani haqida xabar bergan edi. O‘shanda ham Amirliklar tomoni O‘zbekiston bilan munosabatlarni barcha yo‘nalishlarda rivojlantirishga tayyorligini taʼkidlagan.
