Toshkent, O’zbekiston (UzDaily.uz) — Toshkentda Germaniya mehnat bozori ehtiyojlarini inobatga olgan holda O‘zbekistonda mutaxassislar tayyorlashga bag‘ishlangan navbatdagi O‘zbekiston–Germaniya uchrashuvi bo‘lib o‘tdi.
Muhokamada Migratsiya agentligi direktori Muhsinxo‘ja Abdurahmonov, Germaniyaning GP Günter Papenburg AG kompaniyasi direktori Angela Papenburg, Germaniyaning Toshkentdagi elchixonasi vakili Yeva Shnayder, GIZning O‘zbekistondagi jamoasi rahbari Mattias Klingenberg, shuningdek, Germaniya ish beruvchilari va kasbiy tayyorgarlik bilan shug‘ullanuvchi tashkilotlar vakillari ishtirok etdi.
Asosiy mavzulardan biri mutaxassislarni muayyan ochiq vakansiyaga emas, balki ehtimoliy ish beruvchi talablariga mos keladigan muayyan kasb va malakaga ega bo‘lishga yo‘naltirilgan holda tayyorlashni tashkil etish bo‘ldi.
Uchrashuv ishtirokchilari O‘zbekistondagi o‘quv dasturlarini Germaniya mehnat bozori ehtiyojlariga moslashtirish imkoniyatlarini ko‘rib chiqdi. Ish beruvchilarning mutaxassislar malakasiga qo‘yayotgan talablariga alohida eʼtibor qaratildi.
Shuningdek, tomonlar fuqarolarni Germaniyaga ketishidan oldin tayyorlash va ular mamlakatga kelganidan keyin keyingi integratsiyasi masalalarini muhokama qildi.
Uchrashuv mutaxassislarni kasbiy tayyorlash hamda ularni Germaniya mehnat bozorida ish bilan taʼminlash imkoniyatlari masalalari bo‘yicha O‘zbekiston–Germaniya muloqotining navbatdagi bosqichi bo‘ldi.
