Toshkent, O’zbekiston (UzDaily.uz) — Nyu-York shahrida O‘zbekiston Prezidenti Administratsiyasi rahbari Saida Mirziyoyeva BlackRock investitsiya kompaniyasi rahbariyati bilan uchrashdi. Tomonlar 2027 yilda Toshkent xalqaro moliya markazini ishga tushirish masalasini muhokama qildi. Bu haqda Saida Mirziyoyeva maʼlum qildi.
Uchrashuvda BlackRock prezidenti Robert Kapito, kompaniya raisining o‘rinbosari Tomas Donilon, Global Infrastructure Partners raisi va bosh ijrochi direktori Adebayo Ogunlesi, shuningdek, BlackRock‘ning moliyaviy va strategik investorlar guruhi global rahbari hamda Yaqin Sharq bo‘yicha rahbari Charlz Xatami ishtirok etdi.
Uning so‘zlariga ko‘ra, BlackRock Toshkent xalqaro moliya markazining konsepsiyasi va tuzilmasini shakllantirishda ko‘maklashmoqda.
Moliya markazini rivojlantirish masalasi avvalroq davlat darajasida muhokama qilingan. 2026 yil mart oyida O‘zbekiston Prezidenti Shavkat Mirziyoyev uni tashkil etish bo‘yicha tashabbuslar bilan tanishgan. Sentyabr oyida Saida Mirziyoyeva Prezident Administratsiyasi rahbari lavozimini saqlab qolgan holda, Toshkent xalqaro moliya markazi boshqaruvchisi etib tayinlangan. (President.uz)
Nyu-Yorkda, shuningdek, Amerika ishbilarmon doiralari vakillari ishtirokida qo‘shma davra suhbati bo‘lib o‘tdi. Unda O‘zbekiston va mintaqaning yaqin o‘n yilliklardagi rivojlanish istiqbollari muhokama qilindi.
«O‘zbekiston yirik va sifatli investitsiyalar uchun ochilmoqda», — dedi Saida Mirziyoyeva.
