Toshkent, O’zbekiston (UzDaily.uz) — Startup & Venture Summit yakunlari bo‘yicha IT Park Uzbekistan MOST Holding, Founder Institute va SparkLabs kompaniyalari bilan hamkorlik to‘g‘risida uchta memorandum imzolanganini maʼlum qildi. Bu haqda IT Park Uzbekistan xabar berdi.
MOST Holding bilan tuzilgan kelishuv doirasida Central Eurasian Venture Forum 2027 ikkinchi marta O‘zbekistonda o‘tkaziladi. Tadbir xalqaro investorlar, venchur fondlar va texnologik kompaniyalarni bir maydonga jamlaydi.
Founder Institute bilan hamkorlik O‘zbekistonda pre-seed akseleratsiya dasturlarini ishga tushirish, shuningdek, mahalliy startap asoschilarini mentorlar va investorlarning global tarmog‘iga jalb etishga qaratilgan.
SparkLabs bilan birgalikda IT Park Uzbekistan o‘zbek startaplarini Janubiy Koreya bozoriga olib chiqish, ularni akseleratsiya qilish va xalqaro miqyosda kengaytirish bo‘yicha hamkorlikni kuchaytirishni rejalashtirmoqda.
Uchta memorandumning barchasi o‘zbek startaplarining xorijiy bozorlarga chiqish, xalqaro ekspertlar tajribasi va investitsiya imkoniyatlaridan foydalanish imkoniyatlarini kengaytirishni nazarda tutadi.
