Toshkent, O’zbekiston (UzDaily.uz) — Janubiy Koreyaning avtomobil butlovchi qismlarini ishlab chiqaruvchi Hansae Mobility kompaniyasi Farg‘ona viloyatidagi “Qo‘qon” erkin iqtisodiy zonasining Quvasoy filialida yangi sanoat korxonasini ochdi. Loyihaga kiritilgan investitsiyalar hajmi 30 million dollarni tashkil etadi.
Korxonaning ishga tushirilish marosimida Farg‘ona viloyati hokimining birinchi o‘rinbosari Mirzohid Ubaydullayev, Hansae Mobility kompaniyasi raisining o‘rinbosari Kim Ik Xvan, Hansae Mobility Turan ijrochi direktori Chon De Von, “O‘zavtosanoat” AJ raisining o‘rinbosari Davron Hidoyatov, shuningdek, O‘zbekiston va Janubiy Koreyaning tegishli sohalari vakillari ishtirok etdi.
Tadbir ishtirokchilari loyihaning hudud sanoatini rivojlantirish va ikki tomonlama iqtisodiy aloqalarni mustahkamlashdagi ahamiyatini muhokama qildilar.
Kompaniya vakillari investitsiya tashabbusini amalga oshirishda ko‘rsatilgan ko‘mak uchun viloyat rahbariyatiga minnatdorlik bildirdilar.
Shuningdek, xorijiy investitsiyalarni jalb qilish va sanoatni qo‘llab-quvvatlash bo‘yicha amalga oshirilayotgan chora-tadbirlar qayd etildi.
Korxonada hozirgacha 100 dan ortiq ish o‘rni yaratilgan. 2026 yil oxiriga qadar ularning sonini 140 taga, keyinchalik esa 250 taga yetkazish rejalashtirilgan.
Ishlab chiqarish korxonasi buyurtmalarni bajarishni boshladi. Ayni paytda yangi shartnomalar tuzish bo‘yicha muzokaralar ham olib borilmoqda.
Kelgusida kompaniya ishlab chiqarish va servis quvvatlarini kengaytirish, mahalliy yetkazib beruvchilar bilan kooperatsiyani rivojlantirish hamda ishlab chiqarilayotgan avtomobil butlovchi qismlarining mahalliylashtirish darajasini oshirishni maqsad qilgan.
Korxona ochilgan kuni Farg‘ona viloyati hokimi Xayrullo Bozorov ham ushbu korxonaga tashrif buyurdi. U ishlab chiqarish jarayonlari, mahsulotlar turlari va ularning sifati bilan tanishdi, shuningdek, Kim Ik Xvan boshchiligidagi Hansae Mobility delegatsiyasi bilan muzokaralar o‘tkazdi.
Tomonlar mahalliylashtirish dasturi doirasida korxonani yana-da rivojlantirish, mahsulotlar turini kengaytirish va ularni Markaziy Osiyo hamda Yevropa bozorlariga yetkazib berish masalalarini muhokama qildilar.
Muzokaralarda to‘qimachilik sanoatidagi ehtimoliy investitsiya loyihalari va Farg‘ona viloyatiga Janubiy Koreyaning yangi investorlarini jalb qilish masalalari ham ko‘rib chiqildi.
Muzokaralar yakunida tomonlar belgilangan yo‘nalishlar bo‘yicha hamkorlikni davom ettirishga kelishib oldilar.
Korxonaning ochilishi O‘zbekiston va Janubiy Koreya o‘rtasidagi sanoat hamkorligining yangi bosqichini boshlab berdi.
