Toshkent, O’zbekiston (UzDaily.uz) — “Hamkorbank” 2026 yil yanvar–sentyabr oylari yakunlariga ko‘ra, qariyb 1,5 trln so‘m sof foyda oldi. Bu o‘tgan yilning shu davriga nisbatan 16,8 foizga ko‘pdir.
Bank aktivlari 36,7 foizga o‘sib, 44,4 trln so‘mga yetdi. Bu haqda Kapdepo investitsiya banki korporativ axborotlarning openinfo.uz portalida eʼlon qilingan “Hamkorbank” hisobotlariga tayanib xabar berdi.
Faqat uchinchi chorakda, yaʼni iyul–sentyabr oylarida, bankning foydasi 510,5 mlrd so‘mni tashkil etdi. Bu yillik hisobda 10,7 foizga ko‘pdir. To‘qqiz oy davomida bankning jami daromadlari 28,8 foizga o‘sib, 9 trln so‘mga yetdi.
Bank kapitali 30,6 foizga oshib, 8,2 trln so‘mni tashkil qildi. Kreditlar bo‘yicha ehtimoliy yo‘qotishlarni baholash ko‘rsatkichi esa 2,5 foizga o‘sib, 530,2 mlrd so‘mga yetdi.
2026 yil sentyabr oyi boshida “Hamkorbank”ning kredit portfeli 30,8 trln so‘mni tashkil etdi. Ushbu ko‘rsatkich bo‘yicha bank mamlakatdagi xususiy banklar orasida uchinchi o‘rinni egallaydi. Kredit portfelidagi muammoli kreditlar (NPL) ulushi 1,4 foizni tashkil etdi.
