Toshkent, O’zbekiston (UzDaily.uz) — Buxoro viloyatida zamonaviy qishloq xo‘jaligi texnikalaridan, jumladan, paxta terish mashinalaridan foydalanishni kengaytirish imkoniyati ko‘rib chiqilmoqda. Agrar sohani modernizatsiya qilish masalalari Buxoro viloyati hokimi Botir Zaripov va FM WORLD kompaniyasi vakillari o‘rtasida muhokama qilindi. Bu haqda Buxoro viloyati hokimligi matbuot xizmati xabar berdi.
Uchrashuvda FM WORLD bosh direktori Chju Linszyun va kompaniyaning O‘zbekistondagi servis xizmati direktori Xua Inszyun ishtirok etdi.
Muzokaralarda asosiy eʼtibor paxta yig‘im-terimini mexanizatsiyalash va mintaqa qishloq xo‘jaligiga zamonaviy texnologiyalarni joriy etishga qaratildi. Tomonlar mehnat unumdorligini oshirish va yig‘im-terim jarayonini yana-da samarali tashkil etish uchun paxta terish mashinalaridan foydalanish imkoniyatlarini muhokama qildi.
Shuningdek, taklif etilayotgan texnikaning texnik xususiyatlari, uni Buxoro viloyatiga yetkazib berish shartlari, keyingi servis xizmati ko‘rsatilishi va zarur ehtiyot qismlari bilan taʼminlash masalalari alohida ko‘rib chiqildi.
Uchrashuv yakunlari bo‘yicha tomonlar viloyatda zamonaviy qishloq xo‘jaligi texnikasidan samarali foydalanish imkoniyatlarini qo‘shimcha o‘rganishga kelishib oldi.
Shuningdek, paxta terish mashinalarini xarid qilish masalasida hamkorlikni davom ettirish va ushbu yo‘nalishda keyingi ishlarni amalga oshirish bo‘yicha aniq choralarni belgilashga kelishib olindi.
