Toshkent, O’zbekiston (UzDaily.uz) — Farg‘ona viloyati va Belarusning Minsk viloyati savdo-iqtisodiy, investitsiya va ishlab chiqarish sohalarida mintaqalararo hamkorlikni kengaytirishga kelishib oldi.
Hududlar rahbarlari uchrashuvi yakunlari bo‘yicha to‘g‘ridan-to‘g‘ri aloqalarni rivojlantirish va yangi qo‘shma loyihalarni ishga tushirishga qaratilgan qator hujjatlar imzolandi. Bu haqda Farg‘ona viloyati hokimligi matbuot xizmati xabar berdi.
24 sentyabr kuni Farg‘ona viloyati hokimi Xayrullo Bozorov Minsk viloyati ijroiya qo‘mitasi raisi Aleksey Kushnarenko boshchiligidagi Minsk viloyati delegatsiyasini qabul qildi.
Muzokaralarda tomonlar savdo-iqtisodiy hamkorlik, investitsiyaviy sheriklik va sanoat kooperatsiyasini rivojlantirish istiqbollarini muhokama qildi. Bozorov O‘zbekiston Prezidenti Shavkat Mirziyoyevning Aleksandr Lukashenko taklifiga binoan 8–9 iyul kunlari Belarusga amalga oshirgan tashrifi ikki mamlakat munosabatlariga yangi surʼat bag‘ishlaganini taʼkidladi.
Uchrashuv ishtirokchilari Farg‘ona va Minsk viloyatlarining bir-birini to‘ldiruvchi iqtisodiy salohiyatini inobatga olgan holda hududlar o‘rtasida to‘g‘ridan-to‘g‘ri hamkorlik qilish imkoniyatlarini muhokama qildi. Tomonlar vakillari o‘z hududlarining qishloq xo‘jaligi, sanoat, savdo, turizm va ijtimoiy sohalardagi imkoniyatlarini taqdim etdi.
Xususan, Farg‘ona viloyati to‘qimachilik sanoati, meva-sabzavot yetishtirish va qayta ishlash, sanoat ishlab chiqarishi hamda mehnat resurslari bilan taʼminlash sohalarida salohiyatga ega.
Minsk viloyati esa agrotexnologiyalar, chorvachilik, mashinasozlik va zamonaviy uskunalar ishlab chiqarish sohalaridagi salohiyati bilan ajralib turadi.
Aleksey Kushnarenkoning taʼkidlashicha, O‘zbekiston Minsk viloyatining muhim hamkorlaridan biri hisoblanadi. Joriy yilda o‘zaro savdo hajmi $150 millionga yetgan bo‘lib, bu o‘tgan yilgi ko‘rsatkichdan 28 foizga yuqori.
Belarus delegatsiyasi tarkibidan ijroiya qo‘mitalari vakillari, taʼlim, sog‘liqni saqlash va qishloq xo‘jaligi sohalari mutaxassislari, shuningdek, korxona va tashkilotlar rahbarlari o‘rin oldi. Tashrif doirasida korxonalar va turli markazlarga tashrif buyurish, shuningdek, investitsiya loyihalari bo‘yicha muzokaralar o‘tkazish rejalashtirilgan.
Uchrashuv yakunlari bo‘yicha qishloq xo‘jaligi, yengil sanoat, mashinasozlik va turizmni o‘z ichiga olgan hamkorlikning istiqbolli yo‘nalishlari belgilab olindi. Tomonlar amalga oshirishning amaliy bosqichiga o‘tgan loyihalarni ham ko‘rib chiqdi.
Shuningdek, Volojin va Farg‘ona tumanlariga avval imzolangan do‘stlik to‘g‘risidagi kelishuv asosida uch oy davomida qo‘shma tadbirlar rejasini ishlab chiqish taklif etildi. Hujjat iqtisodiy, madaniy va taʼlim sohalarida hamkorlik va almashinuvlarni nazarda tutadi.
Muzokaralar yakunlari bo‘yicha Farg‘ona va Minsk viloyatlari mintaqalararo hamkorlik to‘g‘risida memorandum imzoladi. Bundan tashqari, Volojin va Farg‘ona tumanlari o‘rtasida do‘stona munosabatlar o‘rnatish to‘g‘risida kelishuv tuzildi.
Yana bir memorandumni Belarus Savdo-sanoat palatasining Minsk bo‘limi va O‘zbekiston Savdo-sanoat palatasining Farg‘ona viloyati hududiy boshqarmasi imzoladi.
