Toshkent, O’zbekiston (UzDaily.uz) — O‘zbekiston Madaniyat vaziri Ozodbek Nazarbekov va Turkiya Madaniyat va turizm vaziri Mehmet Nuri Ersoy madaniyat va sanʼat sohasida ikki tomonlama hamkorlikni yana-da rivojlantirish masalalarini muhokama qildi. Uchrashuv “O‘zbekiston” Xalqaro forumlar saroyida bo‘lib o‘tdi.
Tomonlar madaniy aloqalarning joriy holati, hamkorlikning amaldagi yo‘nalishlari va ularni kengaytirish istiqbollarini ko‘rib chiqdi. Madaniyat muassasalari o‘rtasidagi aloqalarni rivojlantirish, ijodiy almashinuvlar va qo‘shma loyihalarni amalga oshirishga alohida eʼtibor qaratildi.
Hamkorlikning huquqiy asosini O‘zbekiston va Turkiya hukumatlari o‘rtasida madaniyat sohasida hamkorlik to‘g‘risida 2018 yil 30 aprel kuni imzolangan bitim tashkil etadi. Hamkorlikning qo‘shimcha mexanizmi sifatida ikki mamlakat madaniyat vazirliklari o‘rtasida hamkorlikni rivojlantirish to‘g‘risidagi protokol xizmat qiladi. Mazkur hujjat 2024 yil 6 iyun kuni rasmiy tashrif doirasida imzolangan.
Ushbu hujjatlar asosida so‘nggi yillarda O‘zbekiston va Turkiya o‘rtasida madaniy almashinuvlar, ijodiy uchrashuvlar va qo‘shma tashabbuslar kengayib bormoqda.
Muzokaralar davomida tajriba almashish, ijodiy jamoalar va sanʼat namoyandalari o‘rtasidagi aloqalarni rivojlantirish, madaniy tadbirlar o‘tkazish, shuningdek, kino, teatr, musiqa, adabiyot va madaniyatning boshqa yo‘nalishlarida qo‘shma ishlarni amalga oshirish masalalari muhokama qilindi.
Tomonlar, shuningdek, mavjud hamkorlik mexanizmlaridan yana-da samarali foydalanish va madaniyat hamda sanʼatning turli sohalarida yangi tashabbuslarni ilgari surish zarurligini taʼkidladi.
Uchrashuv yakunlari bo‘yicha ijodiy almashinuvlarni yana-da kengaytirish va qo‘shma madaniy loyihalar sonini ko‘paytirishga qiziqish bildirildi.
Hamkorlikning rivojlanishi O‘zbekiston va Turkiya xalqlari o‘rtasidagi madaniy-gumanitar aloqalarni mustahkamlash hamda muloqotni kengaytirishga xizmat qilishi kutilmoqda.
