Toshkent, O’zbekiston (UzDaily.uz) — O‘zbekiston tashqi ishlar vaziri Baxtiyor Saidov 17 sentyabr kuni Tokioda Yaponiya Liberal-demokratik partiyasi vitse-prezidenti, “O‘zbekiston–Yaponiya” parlamentlararo do‘stlik ligasi raisi Taro Aso bilan uchrashuv o‘tkazdi.
Saidov O‘zbekiston–Yaponiya munosabatlarini rivojlantirishga Taro Asoning ko‘p yillik shaxsiy hissasini taʼkidlab, uning ikki davlat parlamentlararo do‘stlik guruhi rahbari sifatidagi faoliyatiga yuqori baho berdi.
Uchrashuvda tomonlar O‘zbekiston va Yaponiya o‘rtasidagi strategik sheriklikni yana-da mustahkamlash, parlamentlararo muloqotni rivojlantirish, shuningdek, savdo-iqtisodiy va investitsiyaviy hamkorlikni kengaytirish masalalarini muhokama qildi.
Shuningdek, yuqori darajada erishilgan kelishuvlarni to‘liq amalga oshirishda parlament diplomatiyasining roliga alohida eʼtibor qaratildi.
