Toshkent, O’zbekiston (UzDaily.uz) — Yaponiya Immigratsiya xizmatlari agentligi mamlakatda noqonuniy bo‘lib turgan O‘zbekiston fuqarosini davlat byudjeti hisobidan o‘z vataniga deportatsiya qildi.
U talabalik vizasi bilan Yaponiyaga kirgan va viza muddati tugaganidan keyin ham mamlakatda qolgan. Shundan so‘ng u mahalliy hokimiyat organlari tomonidan qo‘lga olingan. Bu haqda Yaponiyaning O‘zbekistondagi elchixonasi xabar berdi.
Elchixona Yaponiyada noqonuniy bo‘lish yoki ishlash uchun qatʼiy choralar qo‘llanilishidan ogohlantirdi. Bunday holatlarda politsiya tomonidan hibsga olish, immigratsiya muassasasiga joylashtirish va deportatsiya qilish choralari ko‘riladi.
Bundan tashqari, Yaponiya hukumati qoidabuzarlar haqidagi maʼlumotlarni O‘zbekiston hukumatiga taqdim etadi. Shu sababli ularga nisbatan choralar vataniga qaytganidan keyin ham ko‘rilishi mumkin. Diplomatik vakolatxona fuqarolarni «Yaponiyada ishlash mumkin» kabi takliflarga ishonmaslikka chaqirdi.
Elchixona, shuningdek, Yaponiyada qochqin maqomini olish uchun ariza topshirganidan keyin mamlakatda uzoq vaqt qolish yoki ishlash mumkinligi haqida tarqalayotgan maʼlumotlarni rad etdi. Bunday maqsadlarda qochqin maqomini olish uchun ariza berishga yo‘l qo‘yilmaydi.
Qochqin maqomini berish rad etilgan taqdirda, ariza beruvchi immigratsiya muassasasiga joylashtirilishi yoki deportatsiya qilinishi mumkin.
Yolg‘on maʼlumotlarni taqdim etish yoki qochqin maqomini noqonuniy usullar bilan olishga urinish jiddiy huquqiy oqibatlarga olib kelishi mumkin.
