Toshkent, O’zbekiston (UzDaily.uz) — O‘zbekistonda 2026 yilda 400 ta mahallani qamrab oladigan 53 ta mikrosanoat markazi ro‘yxati shakllantirildi. Ularda 7,5 mingta yangi ish o‘rni yaratish rejalashtirilgan.
Markazlar mahallalarda kichik ishlab chiqarish korxonalarini rivojlantirish va ular o‘rtasidagi kooperatsiya aloqalarini kengaytirishga xizmat qilishi kerak. Bu haqda O‘zbekiston Respublikasi Iqtisodiyot va moliya vazirligi xabar berdi.
Markazlar tikuvchilik va mebel ishlab chiqarish, metallga ishlov berish, shuningdek, charm-poyabzal mahsulotlari ishlab chiqarishga ixtisoslashadi. Loyihaning huquqiy asosi sifatida Prezidentning 2026 yil 5 fevraldagi PQ-49-son qarori qabul qilingan.
Birinchi bosqichda markazlar uchun muhandislik-kommunikatsiya tarmoqlarini qurishga byudjetdan 75 mlrd so‘m ajratish ko‘zda tutilgan. 53 ta markazdan 18 tasi bevosita mikrosanoat markazlari uchun maxsus ajratilgan mablag‘lar hisobidan moliyalashtiriladi.
Qolgan 35 ta markazni moliyalashtirish boshqa manbalar, jumladan, «Yangi O‘zbekiston qiyofasi» dasturi va drayver loyihalari doirasida amalga oshiriladi.
Hozirda 18 ta markaz uchun elektr energiyasi, gaz, ichimlik suvi, kanalizatsiya va yo‘llar bilan taʼminlash bo‘yicha jami 31,9 mlrd so‘mlik obyektlar ro‘yxati shakllantirilgan.
Mablag‘larning eng katta qismi — 18 mlrd so‘m yoki 56,6 foizi avtomobil yo‘llari va trotuarlar qurilishiga yo‘naltiriladi. Elektr tarmoqlari uchun 6,2 mlrd so‘m, suv taʼminoti va kanalizatsiya tarmoqlari uchun 4,3 mlrd so‘m, gaz tarmoqlari uchun esa 3,3 mlrd so‘m ajratiladi.
Mikrosanoat markazlarining muhandislik-kommunikatsiya tarmoqlarini qurish uchun allaqachon 35 mlrd so‘m mablag‘ ajratilgan. Sakkizta hudud mahalliy kengashlarining tegishli qarorlarini taqdim etgan.
Ushbu ro‘yxatdagi markazlarning eng ko‘pi Namangan va Qashqadaryo viloyatlarida tashkil etiladi — har birida to‘rttadan. Sirdaryo viloyatida uchta, Farg‘ona va Jizzax viloyatlarida ikkitadan, Qoraqalpog‘iston Respublikasi, Andijon va Xorazm viloyatlarida esa bittadan markaz tashkil etiladi.
Eng ko‘p mablag‘ Sirdaryo viloyatiga — 10,1 mlrd so‘m ajratiladi. Namangan viloyatiga 7,3 mlrd so‘m, Qashqadaryo viloyatiga esa 6,5 mlrd so‘m yo‘naltiriladi.
Qoraqalpog‘iston Respublikasi uchun 3,2 mlrd so‘m, Xorazm viloyatiga 3,1 mlrd so‘m, Farg‘ona viloyatiga 1,8 mlrd so‘m, Jizzax viloyatiga 1,5 mlrd so‘m va Andijon viloyatiga 1,3 mlrd so‘m ajratish ko‘zda tutilgan.
