Toshkent, O’zbekiston (UzDaily.uz) — O‘zbekistonning Farg‘ona viloyati axborot texnologiyalari va sanoat sohalarida Amerika kompaniyalari bilan hamkorlikni kengaytirishni rejalashtirmoqda.
Muzokaralar davomida tomonlar mahalliy IT-loyihalarni qo‘llab-quvvatlash, autsorsing xizmatlarini rivojlantirish hamda neft mahsulotlarini qayta ishlash sohasida hamkorlikni yo‘lga qo‘yish bo‘yicha kelishuvlarga erishdilar. Bu haqda Farg‘ona viloyati hokimligining rasmiy veb-sayti xabar berdi.
Jumladan, Pensilvaniya shtatida faoliyat yurituvchi Benevia Software Solutions, Paragon Software, ABC Software, Integro Software, Good‘s Technology, eMyPeople, Agriteer, Premier, Candle School Software va Rosewood Marketing kompaniyalari bilan hamkorlik qilish bo‘yicha kelishuvlarga erishildi.
Amerika kompaniyalari viloyatdagi IT-tashabbuslarni qo‘llab-quvvatlashi, shuningdek, Fergana Digital Hub maydonchasida yangi loyihalarni ishga tushirishda ishtirok etishi kutilmoqda.
Hamkorlikning yana bir yo‘nalishi mahalliy mutaxassislarning kasbiy ko‘nikmalarini rivojlantirishdan iborat bo‘ladi.
Tomonlar mutaxassislar malakasini oshirish va ularning AQSH mehnat bozoriga chiqish imkoniyatlarini kengaytirishga ko‘maklashishni rejalashtirmoqda.
