Toshkent, O’zbekiston (UzDaily.uz) — Toshkent viloyatining Nurafshon shahrida tozalash inshootlarini qurish jarayonida 13,9 milliard so‘m byudjet mablag‘larining o‘zlashtirilishi aniqlandi. Bu haqda O‘zbekiston Bosh prokuraturasi huzuridagi Departament bo‘linmasi xabar berdi.
Idora maʼlumotlariga ko‘ra, tekshiruv Departamentning Zangiota tumani bo‘limi tomonidan o‘tkazilgan.
Tekshiruv davomida Suv taʼminoti va kanalizatsiya obyektlarini qurish bo‘yicha davlat injiniring kompaniyasining Toshkent hududiy boshqarmasi hamda Toshkent viloyati “Suvoqova” davlat unitar korxonasi o‘rtasidagi shartnoma ijrosi jarayonida soxta hujjatlar rasmiylashtirilgani aniqlangan.
Hujjatlarga ko‘ra, bajarilgan qurilish ishlarining qiymati 87,2 milliard so‘mni tashkil etgan. Biroq amalda bajarilgan ishlar hajmi 73,3 milliard so‘mga baholangan. Tekshiruv maʼlumotlariga ko‘ra, o‘rtadagi 13,9 milliard so‘mlik farq o‘zlashtirilgan.
Mazkur holat yuzasidan O‘zbekiston Respublikasi Jinoyat kodeksining tegishli moddalari bilan jinoyat ishi qo‘zg‘atilgan.
Tergov harakatlari davom etmoqda.
