Toshkent, O’zbekiston (UzDaily.uz) — O‘zbekistonda Maktabgacha va maktab taʼlimi vazirligi hamda Oliy taʼlim, fan va innovatsiyalar vazirligi negizida yagona Taʼlim va fan vazirligi tashkil etildi. Tegishli qaror O‘zbekiston Respublikasi Prezidentining farmoni bilan qabul qilindi.
Islohot zamonaviy talablarni hisobga olgan holda taʼlim, tarbiya va fanning yagona tizimini shakllantirish, shuningdek, taʼlim sifati va samaradorligini oshirish hamda inson kapitalini rivojlantirishga qaratilgan.
Asosiy vazifalardan biri taʼlimning turli darajalari va turlari o‘rtasida integratsiya hamda uzviylikni taʼminlash etib belgilandi. Maktabgacha taʼlimdan tortib oliy taʼlimgacha bo‘lgan butun taʼlim jarayonini, shuningdek, ilmiy faoliyatni qamrab oluvchi yagona boshqaruv tizimini yaratish nazarda tutilmoqda.
O‘zgarishlar doirasida taʼlim va ilm-fan tizimining jamiyat oldidagi hisobdorligini oshirish vazifasi ham belgilangan.
Sohaviy idoralarni birlashtirish taʼlimning turli bosqichlari va ilmiy soha o‘rtasida yagona boshqaruv tizimi doirasida yana-da izchil hamkorlikni taʼminlashga qaratilgan.
