Oʻzbekiston Markaziy banki banklarning shikoyatlarni koʻrib chiqish indeksini joriy etadi

Toshkent, O’zbekiston (UzDaily.uz) — O‘zbekiston Markaziy banki ilk bor fuqarolar murojaatlari bilan ishlash sifati aks ettirilgan banklar indeksini eʼlon qilishni boshlaydi.

Bu haqda Markaziy bank raisi Timur Ishmetov 13 iyun kuni Oliy Majlis Senatining yalpi majlisida, regulyatorning 2025 yildagi faoliyati bo‘yicha hisoboti eshitilgan yig‘ilishda maʼlum qildi.

Regulyator rahbarining so‘zlariga ko‘ra, ishlab chiqilgan indeks banklarning mijozlar shikoyatlari va murojaatlari bilan ishlash samaradorligini baholaydi. Uning taʼkidlashicha, Markaziy bank kelasi haftadan boshlab ushbu ko‘rsatkichni, jumladan eng past natija qayd etgan banklar maʼlumotlari bilan birga eʼlon qilishni boshlaydi.

Ishmetov yaqin vaqt ichida Markaziy bank bank xizmatlari sifati bo‘yicha fuqarolar murojaatlarini qabul qilish uchun ijtimoiy tarmoqlarda alohida kanallarni ishga tushirishini ham maʼlum qildi. Uning aytishicha, banklar bunday murojaatlarga bir soat ichida munosabat bildirishi va muammolarni hal qilish mexanizmlarini ishga tushirishi shart bo‘ladi.

Markaziy bank rahbari regulyatorning o‘zida ham kommunikatsiya bilan bog‘liq muammolar mavjudligini tan oldi. Uning qayd etishicha, yaqinda koll-markaz yangilanib, kontakt markazga aylantirilgan va hozirda sinov rejimida ishlamoqda.

Uning maʼlum qilishicha, fuqarolar murojaatlari soni allaqachon olti barobarga oshgan. Bu esa avval aloqaga chiqish imkoniyatlari bilan bog‘liq qiyinchiliklar mavjud bo‘lganini ko‘rsatadi.

Bundan tashqari, Markaziy bank moliyaviy xizmatlar isteʼmolchilari huquqlarini himoya qilish bo‘yicha ishlarni kuchaytirmoqda.

Qayd etilishicha, endi bankomatlardan naqd pul yechib olishda yuzaga keladigan muammolar faqat texnik nosozlik sifatida emas, balki mijozlar huquqlarining ehtimoliy buzilishi sifatida ham ko‘rib chiqiladi.

Avgust oyidan boshlab regulyator shunday holatlar uchun banklarga nisbatan jarima choralarini qo‘llashni rejalashtirmoqda.