Toshkent, O’zbekiston (UzDaily.uz) — Astana Hub, IT Park Uzbekistan va Eurasia Growth Hub Qozog‘iston va O‘zbekiston texnologik kompaniyalarining xalqaro bozorlarga chiqish imkoniyatlarini kengaytirish bo‘yicha kelishuvga erishdi.
Hamkorlik memorandumi AI & Digital Bridge 2026 xalqaro texnologik forumi doirasida imzolandi. Hujjatni Astana Hub bosh direktori Magjan Madiyev, IT Park Uzbekistan bosh direktori Azamat Karamatov va Eurasia Growth Hub CEOsi Muzaffar Karabayev imzoladi.
Hamkorlik doirasida tomonlar qo‘shma texnologik forumlar, vebinarlar, biznes-missiyalar va B2B uchrashuvlar o‘tkazish, shuningdek, Qozog‘iston va O‘zbekiston startap ekotizimlari o‘rtasidagi hamkorlikni mustahkamlashni rejalashtirmoqda.
Asosiy yo‘nalishlardan biri kompaniyalarga xorijiy buyurtmachilar, strategik hamkorlar, resellerlar, tizim integratorlari, investorlar va akseleratorlar bilan aloqa o‘rnatishda ko‘maklashish bo‘ladi.
Eurasia Growth Hub ko‘magida Qozog‘iston va O‘zbekiston startaplarining Buyuk Britaniya hamda boshqa xorijiy bozorlarga chiqishiga alohida eʼtibor qaratish rejalashtirilgan. Hamkorlar, shuningdek, xorijiy bozorlarni o‘rganish, biznesni rivojlantirish va operatsion masalalarni hal qilishda yordam berishni o‘z ichiga oladigan soft landing mexanizmlarini yaratish imkoniyatini ko‘rib chiqadi.
«Qozog‘iston va O‘zbekistonda kuchli texnologik jamoalar va iqtidorli tadbirkorlar bor. IT Park Uzbekistan bilan birgalikda biz ularga xalqaro bozorlarga chiqish, mijozlar va hamkorlar topish, mahsulotlarini rivojlantirishda yordam berishni istaymiz. Ikki ekotizim va xalqaro hamkorlarimiz imkoniyatlarini birlashtirish orqali mintaqa kompaniyalarining ko‘proq qismi o‘z bozorlaridan tashqarida ham masshtablashishi uchun sharoit yaratmoqdamiz», — dedi Magjan Madiyev.
Azamat Karamatovning so‘zlariga ko‘ra, hamkorlik ikki davlat texnologik kompaniyalariga mijozlar va hamkorlarni izlash, shuningdek, investitsiyalar jalb qilish uchun yangi imkoniyatlar taqdim etishi kerak. U, shuningdek, sunʼiy intellekt hamda tadqiqot va ishlanmalar sohasidagi qo‘shma tashabbuslarning istiqbollarini qayd etib, ular global bozorga mo‘ljallangan mahsulotlarni yaratishga ko‘maklashishi mumkinligini taʼkidladi.
Muzaffar Karabayev Eurasia Growth Hub startaplarga o‘z yechimlarini xorijiy bozorlar talablariga moslashtirish va zarur biznes aloqalarini yo‘lga qo‘yishda yordam berishini taʼkidladi. Uning so‘zlariga ko‘ra, xab platformasi orqali jamoalar amaliy ko‘mak olishi hamda bozorni o‘rganishdan potensial mijozlar va hamkorlar bilan muzokaralarga o‘tishi mumkin.
Memorandum, shuningdek, sunʼiy intellekt hamda tadqiqot va ishlanmalar sohasida qo‘shma tashabbuslarni nazarda tutadi. Tomonlar bilim almashish, pilot loyihalar va mentorlik dasturlarini amalga oshirish, shuningdek, texnologik kompaniyalarni ilmiy va taʼlim tashkilotlari bilan hamkorligini rivojlantirishni rejalashtirmoqda.
AI & Digital Bridge 2026 forumi Qozog‘istonda Raqamlashtirish va sunʼiy intellekt yili doirasida o‘tkazildi. Forum sunʼiy intellekt, raqamli texnologiyalar, tadbirkorlik va inson kapitalini rivojlantirish sohasidagi tashabbuslarni birlashtiruvchi tadbirlar oyligi — AI MONTHning asosiy xalqaro tadbiri bo‘ldi.
