Toshkent, O’zbekiston (UzDaily.uz) — Agrobank 6,1 million dollarlik AgroVentures venchur fondi ishga tushirilganini maʼlum qildi. Fond taqdimoti 23 sentyabr kuni Toshkentda CAEx maydonida 22–25 sentyabr kunlari o‘tkazilayotgan ICT Week Uzbekistan 2026 doirasida bo‘lib o‘tdi.
AgroVentures 2026 yil 13 martda qabul qilingan Prezidentning PQ–99-son qaroriga muvofiq bank tarkibida tashkil etilgan. Agrobank O‘zbekistonda venchur investitsiyalari uchun o‘z tuzilmasini tashkil etgan ilk banklardan biri bo‘ldi.
Fond 60–75 ta kompaniyaga investitsiya kiritish va 1 mingdan ortiq to‘g‘ridan-to‘g‘ri hamda bilvosita ish o‘rinlari yaratilishiga ko‘maklashishni rejalashtirmoqda. AgroVentures‘ning maqsadli ko‘rsatkichlari qatoriga investitsiya qilingan kapitaldan 2,5–3 baravar qaytim olish, yillik ichki daromadlilik meʼyorini 25 foizdan yuqori darajaga yetkazish hamda umumiy prognoz qiymati 15–18 million dollarni tashkil etuvchi 8–12 ta investitsiyadan chiqishni amalga oshirish kiradi.
Fond mablag‘lari dastlabki bosqichdagi va o‘sish bosqichidagi startaplar, tez rivojlanayotgan kompaniyalar, Agrobank‘ning o‘z raqamli va fintex loyihalari, shuningdek, intellektual mulk bilan bog‘liq universitet tadqiqotlari va ishlanmalariga yo‘naltiriladi.
Alohida investitsiyalar hajmi 25 ming dollardan 500 ming dollargacha bo‘ladi. Asosiy yo‘nalishlar agrotexnologiyalar (AgriTech), sunʼiy intellekt va mashinali o‘qitish (AI/ML) bo‘ladi. Boshqa ustuvor yo‘nalishlar qatoriga moliyaviy texnologiyalar (FinTech), chakana savdo, tibbiy texnologiyalar (HealthTech), taʼlim texnologiyalari (EdTech), yashil texnologiyalar (GreenTech), logistika va chuqur texnologiyalar (Deep Tech) kiritilgan.
AgroVentures‘ning birinchi dasturi AI Station bilan hamkorlikda ishga tushiriladigan Agrobank korporativ akseleratori bo‘ladi. 12 haftalik dastur doirasida Agrobank bo‘linmalari va uning kichik hamda o‘rta biznes sohasidagi mijozlari bilan pilot loyihalarni amalga oshirish uchun 20 tagacha startap tanlab olish rejalashtirilgan.
Ishtirokchilar xalqaro master-klasslar va mintaqaviy vorkshoplar, har haftalik mentorlik hamda yakuniy Demo Day tadbirida ishtirok etish imkoniyatiga ega bo‘ladi. Akseleratorda ishtirok etish bepul bo‘lib, tashkilotchilar kompaniyalar yoki ularning tushumlaridan ulush olmaydi.
Eng muvaffaqiyatli jamoalar Agrobank bilan hamkorlik yoki white-label kelishuvlarini tuzishi yoxud AgroVentures‘dan keyingi investitsiyalarni jalb qilishi mumkin.
Dastur ishlaydigan MVP va dastlabki tasdiqlangan natijalarga ega bo‘lgan barcha sohalardagi startaplar uchun ochiq. Ishtirok etish uchun yuridik shaxs sifatida ro‘yxatdan o‘tish talab etilmaydi. Arizalarni qabul qilish 2026 yil 23 oktyabrga qadar davom etadi.
«Agrobank o‘nlab yillar davomida O‘zbekiston fermerlari va tadbirkorlarini moliyalashtirib kelmoqda. AgroVentures tashkil etilishi bilan biz ularning kelajakda qanday ishlashini belgilab beradigan texnologiyalarga ham investitsiya kiritmoqdamiz», — dedi Agrobank boshqaruv raisi Qahorov Erkin Azizjonovich.
Uning so‘zlariga ko‘ra, bank istiqbolli startaplar asoschilari Agrobank‘ni hamkor, investor va birinchi yirik mijoz sifatida qabul qilishini kutmoqda.
AgroVentures LLC O‘zbekistonda venchur va xususiy investitsiyalar ekotizimini shakllantirish, shuningdek, agrosanoat ishlab chiqarishining turli bosqichlaridagi texnologiyalarga eʼtibor qaratish maqsadida Agrobank tarkibida tashkil etilgan.
Agrobank mamlakat bo‘ylab 170 ta filial orqali 7,4 milliondan ortiq mijozga xizmat ko‘rsatadi. Bank fermerlar va agrosanoat majmuasi korxonalariga xizmat ko‘rsatishga ixtisoslashgan bo‘lib, AgroVentures orqali texnologiyalar va startaplar sohasidagi faoliyatini kengaytirmoqda.
