Toshkent, O’zbekiston (UzDaily.uz) — Kutilayotgan yog‘ingarchiliklar munosabati bilan 11–12 oktyabr kunlari O‘zbekistonning tog‘ oldi va tog‘li hududlarida sel va toshqin hodisalari yuzaga kelishi mumkin. Ayrim hududlarda yerlarni suv bosishi ham prognoz qilinmoqda. Bu haqda O‘zgidromet xabar berdi.
Prognoz qilinayotgan yog‘ingarchiliklar munosabati bilan mazkur hududlarda yashovchi aholi va tashrif buyuruvchilardan ehtiyot choralariga rioya qilish so‘raldi.
Ogohlantirish mamlakatning to‘qqizta viloyatidagi ayrim hududlarga taalluqli.
Toshkent viloyatida Ohangaron, Bo‘stonliq, Parkent, Piskent, O‘rtachirchiq va Yuqorichirchiq tumanlari, shuningdek, Angren va Olmaliq shaharlarida sel va toshqin xavfi yuzaga kelishi mumkin.
Samarqand viloyatida Urgut, Samarqand, Bulung‘ur, Nurobod, Qo‘shrabot, Kattaqo‘rg‘on, Payariq, Jomboy va Ishtixon tumanlari ehtimoliy xavf zonasiga kiradi.
Jizzax viloyatida ogohlantirish Zomin, Baxmal, G‘allaorol, Sharof Rashidov, Forish va Yangiobod tumanlariga taalluqli.
Namangan viloyatida Pap, Kosonsoy, Chortoq, Chust, Namangan va Yangiqo‘rg‘on tumanlarida sel va toshqin hodisalari yuzaga kelishi mumkin. Farg‘ona viloyatida esa ro‘yxatga So‘x, Shohimardon, Farg‘ona va Beshariq tumanlari kiritilgan.
Andijon viloyatida ogohlantirish Andijon, Asaka, Jalolquduq, Qo‘rg‘ontepa, Paxtaobod, Izboskan, Xo‘jaobod va Marhamat tumanlari, shuningdek, Xonobod shahriga taalluqli.
Navoiy viloyatida Xatirchi, Navbahor, Nurota, Konimex va Karmana tumanlarida noqulay hodisalar yuzaga kelishi mumkin.
Qashqadaryo viloyatida ro‘yxatga Yakkabog‘, Dehqonobod, Chiroqchi, Kitob, Shahrisabz, Qamashi va G‘uzor tumanlari kiritilgan.
Surxondaryo viloyatida ogohlantirish Sariosiyo, Uzun, Oltinsoy, Denov, Boysun, Sherobod, Sho‘rchi, Qumqo‘rg‘on va Muzrabot tumanlariga taalluqli.
