Toshkent, O’zbekiston (UzDaily.uz) — O‘zbekiston Raqobatni rivojlantirish va isteʼmolchilar huquqlarini himoya qilish qo‘mitasi raisi o‘rinbosari Ulug‘bek Davlatov boshchiligidagi delegatsiya Yevropa Ittifoqining raqobat to‘g‘risidagi qonunchiligi va uni qo‘llash amaliyotiga bag‘ishlangan xalqaro seminarda ishtirok etdi.
Tadbir 2026 yil 12–13 oktyabr kunlari Bryussel shahrida Yevropa Komissiyasining Raqobat masalalari bo‘yicha Bosh direksiyasi (DG COMP) tashabbusi bilan o‘tkazildi.
Ishtirokchilar davlat yordamining raqobatga taʼsirini baholash, monopoliyaga qarshi tekshiruvlar o‘tkazish va iqtisodiy konsentratsiyani nazorat qilish bo‘yicha Yevropa yondashuvlarini ko‘rib chiqdilar.
Seminar dasturidan bitimlarni ko‘rib chiqish jarayonida ular ishtirokchilariga muayyan majburiyatlarni yuklash masalalari ham o‘rin oldi. Shuningdek, milliy raqobat organlari o‘rtasidagi hamkorlik va huquqni qo‘llash amaliyoti bo‘yicha tajriba almashishga alohida eʼtibor qaratildi.
Ekspertlar muhokamasining asosiy mavzularidan biri transchegaraviy savdo va asl mahsulotlar importiga qo‘yiladigan cheklovlar bo‘ldi.
Ishtirokchilar tovar belgilariga bo‘lgan huquqlar bilan raqobat to‘g‘risidagi qonunchilik talablari o‘rtasidagi munosabatni, shuningdek, import cheklovlarining mustaqil importchilarning bozorga kirishi, narxlarni belgilash va isteʼmolchilar tanloviga ehtimoliy taʼsirini muhokama qildilar.
Ushbu masalalar 30 sentyabr kuni DG COMP ekspertlari bilan o‘tkazilgan dastlabki onlayn maslahatlashuvlarning davomi bo‘ldi. Mazkur maslahatlashuvlar O‘zbekiston Raqobatni rivojlantirish va isteʼmolchilar huquqlarini himoya qilish qo‘mitasi ko‘rib chiqayotgan ish yuzasidan o‘tkazilgan edi.
Tashrif doirasida O‘zbekiston delegatsiyasi vakillari DG COMP siyosat va strategiya masalalari bo‘yicha direksiyasi direktori Mariya Yaspers bilan ham uchrashdilar.
Tomonlar institutsional hamkorlikni kengaytirish, transchegaraviy masalalar bo‘yicha maslahatlashuvlar o‘tkazish, raqobat siyosati va davlat yordami sohasida tajriba almashish imkoniyatlarini muhokama qildilar.
Bundan tashqari, birgalikda o‘quv tadbirlarini tashkil etish istiqbollari va o‘zaro anglashuv memorandumini tuzish imkoniyati ko‘rib chiqildi.
Qo‘mita Yevropa ekspertlaridan olingan materiallar va tavsiyalarni milliy qonunchilikni hisobga olgan holda o‘rganib chiqishni rejalashtirmoqda.
Ushbu ish natijalaridan O‘zbekistonda raqobat to‘g‘risidagi qonunchilikni qo‘llash amaliyotini takomillashtirish bo‘yicha takliflar tayyorlashda foydalanish ko‘zda tutilgan.
