Toshkent, O’zbekiston (UzDaily.uz) — O‘zbekiston Oliy Majlisi Qonunchilik palatasida davlat xaridlari tizimini yana-da takomillashtirishni nazarda tutuvchi qonun loyihasi ikkinchi o‘qishda ko‘rib chiqilmoqda.
Hujjat xarid jarayonlarining shaffofligini oshirish, raqobatni rivojlantirish va tadbirkorlarning davlat xaridlaridagi ishtirokini kengaytirishga qaratilgan. Shuningdek, amaldagi mexanizmlarni ilg‘or xorijiy tajribani hisobga olgan holda takomillashtirish taklif etilmoqda.
Qonun loyihasining asosiy qoidalaridan biri davlat xaridlari sohasidagi shikoyatlarni ko‘rib chiqish bo‘yicha hududiy komissiyalarni tashkil etishdir. Ushbu komissiyalar faoliyati mazkur sohada nazoratni kuchaytirish va hisobdorlikni oshirish imkonini berishi kutilmoqda.
Bundan tashqari, hujjatda xarid tartib-taomilida faqat bitta ishtirokchi qatnashgan holatlarda takroriy auksionlar, tanlovlar va tenderlarni o‘tkazish tartibini aniq belgilash nazarda tutilgan.
Shuningdek, byudjet buyurtmachilari davlat xaridlarini amalga oshirishda imtiyozlar qo‘llashi mumkin bo‘lgan mahalliy subyektlar ro‘yxatini kengaytirish taklif etilmoqda.
Muhokama davomida deputatlar o‘z eʼtirozlarini bildirib, qonun loyihasining ayrim qoidalarini qayta ishlash bo‘yicha takliflar kiritdilar. Bildirilgan fikr-mulohazalarni inobatga olgan holda hujjat takomillashtiriladi.
