Toshkent, O’zbekiston (UzDaily.uz) — O‘zbekiston investitsiyalar, sanoat va savdo vaziri o‘rinbosari Ilzat Qosimov Xitoyning Shinjon-Uyg‘ur avtonom rayoni ishbilarmon doiralari vakillari bilan uchrashuv o‘tkazdi. Tomonlar investitsiyaviy va savdo-iqtisodiy hamkorlikni kengaytirish istiqbollarini muhokama qildi.
Muzokaralar davomida ikki mamlakat tadbirkorlari o‘rtasidagi to‘g‘ridan-to‘g‘ri aloqalarni mustahkamlash va qo‘shma tashabbuslarni amalga oshirish masalalariga alohida eʼtibor qaratildi.
Hamkorlikning alohida yo‘nalishlari tibbiyot va sog‘liqni saqlash, tibbiy turizm, qurilish, zamonaviy qurilish va pardozlash materiallari ishlab chiqarish, shuningdek, ilg‘or texnologiyalarni mahalliylashtirishni o‘z ichiga oladi.
Uchrashuv ishtirokchilari, shuningdek, Shinjon-Uyg‘ur avtonom rayoni ishbilarmon doiralari vakillarining 25–26 sentyabr kunlari Nukus shahrida bo‘lib o‘tadigan Xalqaro investitsiya forumida bo‘lajak ishtirokini muhokama qildi.
Muzokaralar yakuniga ko‘ra, tomonlar qo‘shma loyihalarni keyinchalik amaliy jihatdan ishlab chiqishdan o‘zaro manfaatdor ekanini tasdiqladi.
