Toshkent, O’zbekiston (UzDaily.uz) — O‘zbekiston tog‘-kon sanoati va geologiya vazirining birinchi o‘rinbosari Feruza Hamidova 15 sentyabr kuni Britaniyaning AREMCA kompaniyasi vakillari bilan uchrashuv o‘tkazdi. Tomonlar hamkorlik istiqbollari, geologiya va tog‘-kon sanoatiga zamonaviy texnologiyalarni joriy etish masalalarini muhokama qildi. Bu haqda O‘zbekiston Tog‘-kon sanoati va geologiya vazirligi xabar berdi.
Uchrashuv davomida AREMCA vakillari kompaniyaning Markaziy Osiyo mamlakatlarida amalga oshirilayotgan loyihalarini taqdim etdi. Geologik maʼlumotlarni tahlil qilish, istiqbolli uchastkalarni aniqlash va kon ishlari samaradorligini oshirishda sunʼiy intellektdan foydalanish imkoniyatlariga alohida eʼtibor qaratildi.
Vazirlik vakillari O‘zbekistonda yer qaʼridan foydalanish huquqini auksion orqali taqdim etish tartibi, tegishli onlayn tizimlar hamda qonunchilikdagi yangi normalar haqida maʼlumot berdi.
Muzokaralar davomida tomonlar kelgusidagi hamkorlik istiqbollari, ilg‘or texnologiyalarni joriy etish va malakali mutaxassislarni tayyorlash masalalari yuzasidan ham fikr almashdi.
