O‘zbekiston va Gonkong investitsiya hamkorligini kengaytiradi

Toshkent, O’zbekiston (UzDaily.uz) — O‘zbekiston investitsiyalar, sanoat va savdo vaziri o‘rinbosari Ilzat Qosimov Gonkong delegatsiyasi bilan uchrashuv o‘tkazdi. Delegatsiyaga Gonkong Maxsus maʼmuriy hududi Adliya kotibi Pol Lam boshchilik qildi. Tomonlar investitsiya hamkorligini kengaytirish, shuningdek, moliyaviy va huquqiy sohalardagi hamkorlikni yana-da rivojlantirish masalalarini muhokama qildi, deb xabar berdi O‘zbekiston Investitsiyalar, sanoat va savdo vazirligi.

Uchrashuvda Toshkent xalqaro moliya markazini rivojlantirishga alohida eʼtibor qaratildi. O‘zbekiston xalqaro moliyaviy infratuzilmani shakllantirishda Gonkongning tajribasi va ekspertlik salohiyatidan foydalanish imkoniyatini ko‘rib chiqmoqda.

Shuningdek, tomonlar moliya markazini rivojlantirish doirasida Gonkongning yetakchi moliyaviy, investitsiya va yuridik kompaniyalarini jalb etish masalasini muhokama qildi.

Muzokaralarning muhim qismi Investitsiyalarni rag‘batlantirish va himoya qilish to‘g‘risidagi bitimni (BIT), shuningdek, investitsiya va moliya sohalaridagi qator boshqa kelishuvlarni tayyorlash masalasiga bag‘ishlandi.

Ushbu kelishuvlarni amalga oshirish investorlar uchun qo‘shimcha kafolatlarni shakllantirish, biznes yuritish uchun yana-da qulay sharoitlar yaratish hamda O‘zbekiston va Gonkong o‘rtasidagi o‘zaro investitsiyalar hajmini kengaytirish imkonini berishi kutilmoqda.

Toshkent xalqaro moliya markazi O‘zbekistonda maxsus huquqiy rejim asosida tashkil etilmoqda. Markazning vazifalari qatoriga mahalliy va xorijiy investitsiyalarni jalb qilish, kapital bozorlari va moliyaviy xizmatlarni rivojlantirish, shuningdek, milliy moliya bozorini xalqaro kapital bozorlari bilan integratsiya qilish kiradi.