FlyArystan Olmaota — Urganch reyslarini haftasiga ikki marta yo‘lga qo‘ydi
Toshkent, O’zbekiston (UzDaily.uz) — Qozog‘istonning FlyArystan aviakompaniyasi Olmaota va Urganch shaharlari o‘rtasida muntazam aviaqatnovlarni yo‘lga qo‘ydi. Yangi yo‘nalish bo‘yicha birinchi reys amalga oshirildi va Qozog‘iston hamda Xorazm viloyati o‘rtasida sayyohlik aloqalarini rivojlantirish uchun qo‘shimcha imkoniyatlar yaratildi. Bu haqda O‘zbekiston Respublikasi Turizm qo‘mitasi xabar berdi.
Reyslar haftasiga ikki marta — payshanba va yakshanba kunlari amalga oshiriladi. Parvoz davomiyligi 2 soat 35 daqiqani tashkil etadi.
Xorazmga amalga oshirilgan birinchi reys bilan Qozog‘istonning 10 ta sayyohlik kompaniyasi vakillari tashrif buyurdi. Ular uchun uch kunlik axborot turi tashkil etildi. Uning doirasida mahalliy turoperatorlar ishtirokida B2B uchrashuvlar va vorkshop o‘tkazilishi rejalashtirilgan.
Safar davomida Qozog‘iston sayyohlik biznesi vakillari Xorazmning tarixiy-madaniy obidalari, shuningdek, hududning sayyohlik salohiyati bilan tanishadi.
Tashkilotchilar bunday axborot turlarini o‘tkazish Xorazm viloyatini Qozog‘iston sayyohlik bozorida targ‘ib qilishga xizmat qiladi, deb hisoblamoqda. Bundan tashqari, ular ikki mamlakat sayyohlik kompaniyalari o‘rtasida to‘g‘ridan-to‘g‘ri hamkorlikni yo‘lga qo‘yish va o‘zaro sayyohlik almashinuvini oshirishga qaratilgan.
Yangi aviayo‘nalish Qozog‘istondan keladigan sayyohlar uchun Xorazmning transport jihatidan qulayligini ham oshiradi hamda hududga xalqaro sayyohlik oqimini rivojlantirish uchun qo‘shimcha imkoniyatlar yaratadi.
