Toshkent, O’zbekiston (UzDaily.uz) — O‘zbekiston va Tatarstan Fanlar akademiyalari 2026–2030 yillarga mo‘ljallangan ilmiy hamkorlikni rivojlantirish bo‘yicha chora-tadbirlar rejasini imzoladi.
Hujjat O‘zbekiston delegatsiyasining Qozon shahriga ishchi tashrifi davomida O‘zbekiston Respublikasi Fanlar akademiyasi prezidenti Shavkat Ayupov va Tatarstan Respublikasi Fanlar akademiyasi prezidenti Rustam Minnixanov tomonidan imzolandi.
Yangi reja 2025 yilda imzolangan o‘zaro anglashuv memorandumining davomi hisoblanadi. U ikki tomonning ilmiy muassasalari o‘rtasidagi hamkorlikni kengaytirish, fundamental va amaliy tadqiqotlar sohasidagi sheriklikni rivojlantirishni nazarda tutadi.
Hamkorlik fizika-matematika, texnika, kimyo-biologiya, shuningdek, ijtimoiy-gumanitar fanlar sohalarini qamrab oladi.
Rejada olimlar o‘rtasida tajriba almashish, qo‘shma tadqiqotlar o‘tkazish, ilmiy konferensiyalar va seminarlar tashkil etish, shuningdek, har ikki akademiya tarkibiga kiruvchi ilmiy tashkilotlar o‘rtasida to‘g‘ridan-to‘g‘ri aloqalarni mustahkamlash kabi yo‘nalishlar nazarda tutilgan.
Rejani amalga oshirish tomonlarning ilmiy salohiyati va tadqiqot infratuzilmasidan yana-da samarali foydalanish, istiqbolli ilm-fan yo‘nalishlarini rivojlantirish hamda tadqiqot natijalarini amaliyotga tatbiq etishga ko‘maklashishi kutilmoqda.
Yosh olimlar va tadqiqotchilar o‘rtasidagi hamkorlikka ham alohida eʼtibor qaratiladi. Hujjat ilmiy kadrlar tayyorlash sohasida tajriba almashish va yosh mutaxassislarning xalqaro ilmiy hamkorlikdagi ishtirokini kengaytirishni nazarda tutadi.
Imzolangan reja qo‘shma tadqiqot loyihalari va ilmiy tajriba almashish asosida O‘zbekiston va Tatarstan o‘rtasidagi ilmiy aloqalarni mustahkamlash hamda uzoq muddatli sheriklikni rivojlantirishga qaratilgan.
