Toshkent, O’zbekiston (UzDaily.uz) — O‘zbekiston Prezidenti Shavkat Mirziyoyev Mustaqil Davlatlar Hamdo‘stligi (MDH) erkin savdo hududining cheklovlarsiz to‘laqonli faoliyat yuritishini taʼminlashga chaqirdi.
Buning uchun texnik to‘siqlarni bartaraf etish, muvofiqlik sertifikatlarini o‘zaro tan olishni taʼminlash va davlat xaridlarida ishtirok etish imkoniyatlarini kengaytirish zarurligini taʼkidladi.
Davlat rahbari 9 oktyabr kuni Turkmanistonning Avaza shahrida bo‘lib o‘tgan MDH Davlat rahbarlari kengashi majlisida nutq so‘zladi. Bu haqda O‘zbekiston Respublikasi Prezidenti matbuot xizmati xabar berdi.
Mirziyoyev erkin savdo hududining faoliyatini Hamdo‘stlik mamlakatlari birgalikdagi saʼy-harakatlarini yo‘naltirishi lozim bo‘lgan ustuvor vazifalarning birinchisi sifatida ko‘rsatdi.
Prezidentning so‘zlariga ko‘ra, MDH mamlakatlari tajribasi iqtisodiy integratsiya va ishlab chiqarish kooperatsiyasi barqarorlik hamda taraqqiyotning asosiy omillaridan biri bo‘lib qolayotganini ko‘rsatmoqda. O‘zbekiston davlatlarning umumiy salohiyatidan to‘liq foydalanish va savdo-investitsiyaviy sheriklikni yangi bosqichga olib chiqish zarur, deb hisoblaydi.
Davlat rahbari oddiy tovar ayirboshlashdan bosqichma-bosqich to‘liq qiymat qo‘shish zanjirlarini birgalikda yaratishga o‘tishni taklif qildi. Buning uchun birgalikda ishlab chiqarish, investitsiya kiritish va mahsulotlarni tashqi bozorlarga olib chiqish zarurligini taʼkidladi.
Uning qayd etishicha, bunday kooperatsiya eng sezilarli natijalarni beradi: yangi korxonalar tashkil etiladi, ish o‘rinlari yaratiladi va fuqarolarning daromadlari oshadi.
Bozorlarga kirish imkoniyatlari haqida so‘z yuritar ekan, Prezident qishloq xo‘jaligi mahsulotlari savdosi masalasiga ham to‘xtaldi. O‘zbekiston qishloq xo‘jaligi mahsulotlarini davlat xaridlari sohasida o‘zaro foydalanish imkoniyatlarini kengaytirish to‘g‘risidagi bitimni tez fursatda kelishib olishga umid qilmoqda.
Bundan tashqari, Mirziyoyev oziq-ovqat mahsulotlari va o‘g‘itlar eksportiga cheklovlar joriy etilishidan oldin xabardor qilish va maslahatlashuvlar o‘tkazish mexanizmini joriy etishni taklif qildi.
Sammitdagi nutqi davomida Prezident dunyo tubdan o‘zgarayotganini, taranglik kuchayib, odatiy iqtisodiy aloqalar qayta shakllanayotganini taʼkidladi.
Bunday sharoitda erishilgan kelishuvlar amalda aniq natijalar berishiga erishish ayniqsa muhimdir.
Kelasi yili MDHga raislik O‘zbekistonga o‘tadi.
