Toshkent, O’zbekiston (UzDaily.uz) — O‘zbekiston va Ruminiya texnik jihatdan tartibga solish sohasida, jumladan, standartlashtirish, metrologiya, sertifikatlash va savdodagi texnik to‘siqlarni bartaraf etish yo‘nalishlarida hamkorlikni kengaytirish niyatida. Bu haqda O‘zbekiston Texnik jihatdan tartibga solish agentligi xabar berdi.
Texnik jihatdan tartibga solish agentligi direktori Akmal Djumanazarov O‘zbekistondagi Ruminiyaning Favqulodda va muxtor elchisi Daniel Kristian Chobanu bilan uchrashuv o‘tkazdi.
Tomonlar muvofiqlikni baholash, bozor nazorati va mahsulot xavfsizligini taʼminlash sohalarida hamkorlik istiqbollarini ko‘rib chiqdi. Ikki tomonlama savdo rivojiga taʼsir qilishi mumkin bo‘lgan texnik to‘siqlarni bartaraf etish masalalariga alohida eʼtibor qaratildi.
Qayd etilganidek, O‘zbekiston va Ruminiya o‘rtasidagi savdo-iqtisodiy munosabatlar izchil rivojlanmoqda. 2025 yil yakunlariga ko‘ra, mamlakatlar o‘rtasidagi o‘zaro savdo hajmi 90,6 million AQSH dollariga yetgan.
Uchrashuv ishtirokchilari texnik jihatdan tartibga solish sohasida mutaxassislarni tayyorlash va ularning malakasini oshirish, kasbiy tajriba almashish, zamonaviy laboratoriyalarni rivojlantirish, shuningdek, mahsulot xavfsizligini baholash va bozor nazorati mexanizmlarini takomillashtirish masalalarini ham muhokama qildi.
Texnik talablar va muvofiqlikni baholash tizimlari sohasidagi hamkorlik alohida yo‘nalish sifatida belgilandi. Uchrashuvda taʼkidlanganidek, ushbu yo‘nalishni rivojlantirish O‘zbekistonning to‘qimachilik va tikuv-trikotaj mahsulotlari eksportini Yevropa bozorlariga kengaytirish uchun muhim ahamiyatga ega.
Muzokaralar yakunlari bo‘yicha tomonlar Yevropa texnik ko‘magi dasturlari doirasida yangi qo‘shma loyihalar uchun istiqbolli yo‘nalishlarni belgiladi. Shuningdek, ilg‘or Yevropa tajribasini joriy etish va texnik jihatdan tartibga solish sohasida amaliy loyihalarga o‘tish imkoniyati qayd etildi.
