Toshkent, O’zbekiston (UzDaily.uz) — 2026 yil 1 sentyabr holatiga ko‘ra, O‘zbekiston sanoatida xorijiy investitsiyalar ishtirokidagi 4 177 ta korxona faoliyat yuritgan. Bu haqda O‘zbekiston Respublikasi Milliy statistika qo‘mitasi xabar berdi.
Sanoat mamlakatda iqtisodiy faoliyatning asosiy turlari bo‘yicha xorijiy kapital ishtirokidagi korxonalar soni jihatidan ikkinchi o‘rinni egallaydi. Bunday korxonalar eng ko‘p savdo sohasida ro‘yxatdan o‘tgan bo‘lib, ularning soni 7 637 tani tashkil etadi.
Axborot va aloqa sohasida xorijiy kapital ishtirokidagi 1 840 ta korxona faoliyat yuritmoqda. Qurilish sohasida 1 769 ta, yashash va ovqatlanish bo‘yicha xizmatlar sohasida 945 ta, tashish va saqlash sohasida esa 665 ta korxona ishlamoqda.
Qishloq, o‘rmon va baliqchilik xo‘jaligida xorijiy investitsiyalar ishtirokidagi 541 ta korxona mavjud. Sog‘liqni saqlash va ijtimoiy xizmatlar ko‘rsatish sohasida 247 ta korxona faoliyat yuritmoqda. Iqtisodiy faoliyatning boshqa turlariga 3 669 ta korxona to‘g‘ri keladi.
Umuman, 2026 yil 1 sentyabr holatiga ko‘ra, O‘zbekistonda xorijiy investitsiyalar ishtirokidagi jami 21 490 ta korxona faoliyat yuritgan.
