Toshkent, O’zbekiston (UzDaily.uz) — O‘zbekiston terma jamoasi himoyachisi Behruz Karimov Shveysariya chempionatining 9-turidan o‘rin olgan uchrashuvda natijali uzatma muallifi bo‘ldi. Unda “Lugano” safarda “Lozanna”ni 4:0 hisobida yirik hisobda mag‘lub etdi. Uchrashuv «Stad de la Tuyer» stadionida bo‘lib o‘tdi.
“Lugano”ning to‘rtta golining barchasini himoyachilar urdi. Markaziy himoyachi Xannes Delkrua xet-trik qayd etdi. U 35-daqiqada burchak zarbasidan keyin hisobni ochdi, 48-daqiqada esa bosh bilan zarba berib, jamoasi ustunligini ikki karra oshirdi.
Delkrua uchinchi golini 52-daqiqada Behruz Karimovning o‘ng qanotdan uzatgan to‘pini bosh bilan darvozaga yo‘llab kiritdi. “Lugano”ning to‘rtinchi goli avtogol bo‘ldi: 61-daqiqada “Lozanna” himoyachisi Karim Sou zaxiradan maydonga tushgan Mattia Dzanottining uzatmasidan keyin to‘pni o‘z darvozasiga kiritib qo‘ydi.
“Lugano”ning uchinchi goliga qadar “Lozanna” bir kishi kam bo‘lib qoldi. 52-daqiqada mezbonlar futbolchisi, «Manchester Yunayted»dan ijaraga olingan Seku Kone Anto Grgichga qarshi qo‘pol qoidabuzarlik uchun to‘g‘ridan-to‘g‘ri qizil kartochka oldi.
G‘alabadan so‘ng “Lugano” Shveysariya Superligasi turnir jadvalida yakka peshqadamlikni saqlab qoldi. To‘qqiz turdan keyin jamoa 25 ochko to‘plagan bo‘lib, sakkizta g‘alaba qozongan va bir marta durang o‘ynagan. Klubni eng yaqin taʼqibchisi «Yang Boyz»dan olti ochko ajratib turibdi.
19 yoshli Behruz Karimov uchun golli uzatma Shveysariya klubi safidagi ketma-ket ikkinchi natijali harakati bo‘ldi. Undan avvalgi turda, 16 sentyabr kuni, Karimov “Lugano”ning “Sankt-Gallen” ustidan 4:1 hisobidagi g‘alabali o‘yinida klubdagi ilk golini urgan edi.
Karimov 2026 yil avgust oyida Toshkentning “Surxon” klubidan “Lugano”ga o‘tgan. Klub bilan shartnoma besh yilga mo‘ljallangan.
