Toshkent, O’zbekiston (UzDaily.uz) — O‘zbekiston erkaklar terma jamoasi Samarqandda o‘tayotgan 46-Butunjahon shaxmat olimpiadasining beshinchi turida Vengriya terma jamoasini 4:0 hisobida mag‘lub etib, 100 foizlik natijasini saqlab qoldi.
Barcha to‘rtta taxtada Nodirbek Abdusattorov, Javohir Sindorov, Nodirbek Yoqubboyev va Shamsiddin Vohidov g‘alaba qozondi.
O‘zbekiston ayollar terma jamoasi beshinchi turda turnir favoritlaridan biri bo‘lgan AQSH terma jamoasi bilan durang o‘ynadi. Afruza Hamdamova g‘alaba qozondi, Umida Omonova va Nilufarxon Imomqo‘ziyeva o‘z partiyalarini durang bilan yakunladi. Gulruhbegim Tohirjonova teng vaziyatda xatoga yo‘l qo‘yib, raqibasiga mag‘lub bo‘ldi. Natijada uchrashuv 2:2 hisobida yakunlandi.
O‘zbekistonning qo‘shimcha terma jamoalari o‘rtasida erkaklar jamoasi O‘zbekiston-2 Filippinni mag‘lub etdi, O‘zbekiston-3 esa Avstriya bilan durang o‘ynadi. Ayollar turnirida O‘zbekiston-2 Tunisni, O‘zbekiston-3 esa Madagaskarni mag‘lub etdi.
Beshinchi turdan so‘ng O‘zbekistonning asosiy erkaklar terma jamoasi ochiq turnirda peshqadamlik qilmoqda. Ikkinchi o‘rinni Hindiston egallab turibdi.
O‘zbekiston ayollar terma jamoasi oltinchi o‘rinda bormoqda.
Oltinchi turda O‘zbekiston erkaklar terma jamoasi Hindistonga qarshi bahs olib boradi. Har ikki jamoa ham turnir yetakchilari qatorida borayotgani sababli, ularning o‘zaro uchrashuvi olimpiadaning markaziy bahslaridan biri bo‘ladi.
O‘zbekiston ayollar terma jamoasi oltinchi turda Gruziya bilan o‘ynaydi. Ochiq turnirda O‘zbekiston-2 Ispaniyaga, O‘zbekiston-3 esa Avstraliyaga qarshi bahs olib boradi. Ayollar turnirida O‘zbekiston-2 Shimoliy Makedoniya bilan, O‘zbekiston-3 esa Shvetsiya bilan o‘ynaydi.
46-Butunjahon shaxmat olimpiadasi 2026 yil 15–27 sentyabr kunlari Samarqandda bo‘lib o‘tmoqda.
