Toshkent, O’zbekiston (UzDaily.uz) — O‘zbekiston terma jamoasi Yaponiyaning Ayti-Nagoya shahrida bo‘lib o‘tayotgan 2026 yilgi Paraosiyo o‘yinlarida yana bir qator medallarni qo‘lga kiritdi. Mamlakat vakillari yengil atletika, paravelosport, pauerlifting va paradzyudo bo‘yicha bahslarda oltin, kumush va bronza medallariga sazovor bo‘ldi.
Yengil atletika bo‘yicha ayollar o‘rtasidagi T11 sinfida 200 metrga yugurish musobaqasida Asliya Mirzayorova 25,86 soniya natija bilan ikkinchi o‘rinni egalladi. Masofani bosib o‘tishda unga yetakchi sportchi Sardor Baxtiyorov yordam berdi.
Angelina Kolesnikova F44/F64 sinflarida ayollar o‘rtasida disk uloqtirish bahslarida 30,10 metr natija bilan bronza medalini qo‘lga kiritdi. Yoqutxon Holbekova esa F12 sinfida nayza uloqtirish bo‘yicha 32,43 metr natija ko‘rsatib, kumush medalga sazovor bo‘ldi. Ushbu yo‘nalish sportchining asosiy ixtisosligi hisoblanmaydi.
Erkaklar o‘rtasida Diyopbek Umarov F12 sinfida yadro itarish bo‘yicha 12,54 metr natija bilan uchinchi o‘rinni egalladi. Sodiqjon Mamadiyev T37 sinfida uzunlikka sakrash musobaqasida 5,69 metr natija ko‘rsatib, bronza medalini qo‘lga kiritdi. Yorqinbek Odilov esa F57 sinfida disk uloqtirish bo‘yicha 45,10 metr natija bilan kumush medalga sazovor bo‘ldi.
Paravelosport bo‘yicha erkaklar o‘rtasida C5 sinfida 4000 metr masofaga taʼqib poygasida o‘zbekistonlik sportchilar birinchi va ikkinchi o‘rinlarni egalladi. Boymurod Yavqochev musobaqa chempioni bo‘ldi, Azimbek Abdullayev esa kumush medalni qo‘lga kiritdi. Bronza medali Birlashgan Arab Amirliklari vakiliga nasib etdi.
Ayollar o‘rtasida pauerlifting bo‘yicha 50 kilogrammgacha bo‘lgan vazn toifasida Nasiba Toshpo‘latova finalda 123 kilogramm toshni ko‘tarib, ikkinchi o‘rinni egalladi. 55 kilogrammgacha bo‘lgan vazn toifasida esa Akidahon Axtamova 128 kilogramm natija bilan oltin medalni qo‘lga kiritdi va Paraosiyo o‘yinlari rekordini o‘rnatdi.
Ushbu vazn toifasida Xitoy vakili 117 kilogramm natija bilan kumush, Tailand sportchisi esa 112 kilogramm natija bilan bronza medaliga sazovor bo‘ldi.
O‘zbekistonlik sportchilar paradzyudo bo‘yicha ham oltin medallarni qo‘lga kiritdi. Erkaklar o‘rtasida J1 sinfining 81 kilogrammgacha bo‘lgan vazn toifasida Shohruh Mamedov g‘olib bo‘ldi. U finalda Tojikiston vakili ustidan 002:0 hisobida g‘alaba qozondi. Ushbu g‘alaba O‘zbekistonga o‘yinlarda paradzyudo bo‘yicha ilk oltin medalni taqdim etdi.
J1 sinfining 95 kilogrammgacha bo‘lgan vazn toifasida finalda ikki o‘zbekistonlik sportchi o‘zaro kuch sinashdi. Muhammad Abduqulov Turg‘un Abdiyevni 003:0 hisobida mag‘lub etib, oltin medalni qo‘lga kiritdi. Turg‘un Abdiyev esa kumush medal sohibi bo‘ldi. Ushbu vazn toifasida bronza medallari Eron va Indoneziya sportchilariga nasib etdi.
Ayollar o‘rtasida J2 sinfining 60 kilogrammgacha bo‘lgan vazn toifasida Kumushxon Xo‘jayeva chempionlikni qo‘lga kiritdi. U final bahsida Xitoy vakilasini 100:001 hisobida mag‘lub etdi.
O‘zbekistonlik sportchilarning bir nechta sport turlaridagi muvaffaqiyatli ishtiroki Ayti-Nagoyada o‘tayotgan Paraosiyo o‘yinlarida milliy terma jamoaning medallar jamg‘armasini yana-da boyitdi.
