Toshkent, O’zbekiston (UzDaily.uz) — O‘zbekiston terma jamoasi Aichi-Nagoya–2026 V Paraosiyo o‘yinlarida paradzyudo bo‘yicha musobaqalarda uchta bronza medalini qo‘lga kiritdi.
Erkaklar o‘rtasida J1 sinfida, 70 kilogrammgacha bo‘lgan vazn toifasida Ibrohimjon Akbarov bronza medali sohibi bo‘ldi. U uchinchi o‘rin uchun kechgan bellashuvda hamyurti Kosim Safarqulov ustidan g‘alaba qozondi.
Ayollar o‘rtasida J1 sinfida, 60 kilogrammgacha bo‘lgan vazn toifasida Fotima Toirova bronza medalini qo‘lga kiritdi. U uchinchi o‘rin uchun bahsda Qozog‘iston vakilasini 100:0 hisobida mag‘lub etdi.
O‘zbekistonga yana bir bronza medalini Bonu Babayeva taqdim etdi. U ayollar o‘rtasida J1 sinfida, 52 kilogrammgacha bo‘lgan vazn toifasida uchinchi o‘rin uchun bellashuvda indoneziyalik sportchi Noviya Larassatini mag‘lub etdi.
