Toshkent, O’zbekiston (UzDaily.uz) — O‘zbekiston terma jamoasi Aichi-Nagoya 2026 Osiyo Parao‘yinlarida oltin, kumush va bronza medallarini qo‘lga kiritdi.
Mamlakat sportchilari para dzyudo, parapauerlifting, shosse velosporti, uzunlikka va balandlikka sakrash, shuningdek, disk uloqtirish musobaqalarida shohsupaga ko‘tarildi.
Parapauerlifting bo‘yicha Bekzod Jamilov va Ruxshona O‘ktamova oltin medallarni qo‘lga kiritdi. Jamilov erkaklar o‘rtasida 80 kilogrammgacha bo‘lgan vazn toifasida g‘olib bo‘ldi. U finalda 229 kilogramm og‘irlikni ko‘tardi.
Ushbu vazn toifasida Iroq sportchisi 222 kilogramm natija bilan kumush, Xitoy vakili esa 215 kilogramm ko‘rsatkich bilan bronza medaliga sazovor bo‘ldi.
O‘ktamova ayollar o‘rtasida 67 kilogrammgacha bo‘lgan vazn toifasida 127 kilogramm natija qayd etib, birinchi o‘rinni egalladi.
Para dzyudo musobaqalarida O‘zbekiston yana ikkita oltin medalni qo‘lga kiritdi. Dovurxon Karomatov erkaklar o‘rtasida J2 toifasining 95 kilogrammgacha bo‘lgan vazn yo‘nalishida g‘olib bo‘ldi. U aylana tizimida o‘tkazilgan musobaqadagi barcha bellashuvlarda g‘alaba qozondi.
Ayollar o‘rtasida J2 toifasining 70 kilogrammdan yuqori vazn yo‘nalishida Mohinur Parmonova kumush, Habiba Jo‘rayeva esa bronza medalini qo‘lga kiritdi. Parmonova uchta g‘alaba va bitta mag‘lubiyat qayd etgan bo‘lsa, Jo‘rayeva musobaqani ikkita g‘alaba va ikkita mag‘lubiyat bilan yakunladi. Feruza Ergasheva ham J1 toifasining 70 kilogrammdan yuqori vazn yo‘nalishida bronza medaliga sazovor bo‘ldi.
Shosse velosporti bo‘yicha Marjona Pardaboyeva T1–2 toifasida ayollar o‘rtasidagi alohida startli poygada 25:58.04 natija bilan g‘olib chiqdi.
Odina Hamdamova 31:36.76 natija bilan finishga ikkinchi bo‘lib yetib keldi. Erkaklar o‘rtasida mazkur toifada o‘tkazilgan poygada Jahongir Xalilov 20:56.10 natija bilan uchinchi o‘rinni egalladi.
B toifasida (tandem) ayollar o‘rtasidagi alohida startli poygada Robiyaxon Toshpo‘latova yetakchi sportchi Olga Zabelinskaya bilan birgalikda ishtirok etib, kumush medalni qo‘lga kiritdi. Ularning natijasi 32:45.82 ni tashkil etdi.
Yengil atletika bo‘yicha Botir Muhammedov T13 toifasida uzunlikka sakrash musobaqasida 6,24 metr natija bilan uchinchi o‘rinni egalladi. Temurbek Giyosov esa T64 toifasida balandlikka sakrashda 1,86 metrlik balandlikni zabt etib, bronza medaliga sazovor bo‘ldi.
Disk uloqtirish bo‘yicha ayollar o‘rtasida F56/57 toifasida Mog‘igul Sharobidinova O‘zbekiston terma jamoasiga yana bir kumush medalni taqdim etdi.
Uning natijasi 25,12 metrni tashkil etdi.
