Toshkent, O’zbekiston (UzDaily.uz) — Sirdaryo viloyatida sud “S.G.F.” MCHJga 1,3 milliard so‘m miqdorida qarz hisoblash to‘g‘risidagi soliq inspeksiyasi qarorini bekor qildi. Hisob-kitoblarga kadastr maʼlumotlaridagi texnik xato sabab bo‘lgan. Bu haqda Biznes-ombudsman xabar berdi.
Nizo 2023 yil noyabr oyida sud korxonaga 11,2 gektar yer uchastkasini ajratish to‘g‘risidagi hokim qarorini bekor qilganidan keyin yuzaga kelgan.
Ushbu hudud Mirzaobod tumani zaxirasiga qaytarilgan, biroq yer uchastkasi haqidagi maʼlumotlar avvalgi axborot tizimida saqlanib qolgan. Natijada korxonaga yer solig‘i hisoblash davom ettirilgan.
Soliq auditi natijalariga ko‘ra, korxona zimmasiga qo‘shimcha ravishda 645,3 million so‘m yer solig‘i, 129 million so‘mdan ortiq moliyaviy jarima, shuningdek, penya to‘lash majburiyati yuklatilgan.
Tadbirkorning manfaatlarini himoya qilish maqsadida Biznes-ombudsman apparati sudga murojaat qildi. Guliston tumanlararo maʼmuriy sudi soliq inspeksiyasining qarorini haqiqiy emas deb topdi.
Shundan so‘ng yer uchastkasi kadastr hisobidan chiqarildi va korxonaga nisbatan avval qo‘llanilgan barcha cheklovlar bekor qilindi.
