Toshkent, O’zbekiston (UzDaily.uz) — Xalqaro ekspert, Charles Kendall & Partners kompaniyasi direktori Skott Diken O‘zbekistonda davlat xaridlari tizimining rivojlanishini ijobiy baholadi. U kasbiy taʼlim, mutaxassislarni sertifikatlash va xalqaro tajribani joriy etish muhimligini taʼkidladi.
Sanoat kooperatsiyasi va davlat xaridlari agentligi Osiyo taraqqiyot banki granti ko‘magida Charles Kendall & Partners va RSM Consulting kompaniyalari bilan hamkorlikda xaridlar tizimini professionallashtirish loyihasini amalga oshirmoqda.
Skott Dikenning so‘zlariga ko‘ra, O‘zbekiston davlat xaridlari sohasida keng ko‘lamli o‘zgarishlarni amalga oshirmoqda va xalqaro amaliyotlarga tobora ko‘proq eʼtibor qaratmoqda.
Bu jarayonda davlat xaridlari siyosatini takomillashtirish, institutsional salohiyatni mustahkamlash, xarid tartib-taomillarining samaradorligi va shaffofligini oshirish bilan shug‘ullanuvchi Agentlik muhim o‘rin tutadi.
Ekspertning taʼkidlashicha, islohotlar nafaqat qonunchilik, normativ-huquqiy baza va raqamli platformalarni, balki xaridlar uchun masʼul xodimlarning kasbiy kompetensiyalarini rivojlantirishni ham qamrab olishi kerak.
Loyiha doirasida xalqaro mutaxassislar o‘quv dasturlari, o‘quv rejalari va taʼlimni boshqarish tizimini ishlab chiqishda ishtirok etmoqda.
Bunday yondashuv milliy xaridlar tizimining o‘ziga xos xususiyatlari va uning ishtirokchilari amaliy ehtiyojlarini hisobga olgan holda xalqaro tajribadan foydalanish imkonini beradi.
Diken xaridlar bo‘yicha mutaxassislarni uch bosqichli kasbiy sertifikatlash tizimini yaratishga alohida ahamiyat qaratdi. Ushbu tizim kasbiy rivojlanishning izchil bosqichlarini — bazaviy bilimlarni o‘zlashtirishdan tortib, murakkab va strategik ko‘nikmalarni egallashgacha bo‘lgan jarayonni belgilashi kerak.
Ekspertning fikricha, sertifikatlash samaradorligini berilgan hujjatlar soni bilan emas, balki uning xaridlar faoliyatidagi amaliy natijalarga taʼsiri bilan baholash lozim.
Puxta tashkil etilgan tizim xaridlarni rejalashtirishni takomillashtirishi, raqobatni kuchaytirishi, shartnomalarni boshqarish sifatini oshirishi, xatarlarni kamaytirishi va byudjet mablag‘laridan oqilona foydalanishga yordam berishi mumkin.
Diken, shuningdek, xalqaro modellarni mahalliy xususiyatlarni hisobga olmasdan ko‘chirib olish emas, balki ularni O‘zbekistonning huquqiy bazasi, institutsional tuzilmasi, bozor sharoitlari va kasbiy muhitiga moslashtirish zarurligini taʼkidladi.
Uning baholashicha, qonunchilik, raqamlashtirish, kasbiy taʼlim va sertifikatlashni o‘zaro muvofiq ravishda rivojlantirish jarayonlarga ustuvor eʼtibor qaratishdan kompetensiyalar va natijalarga yo‘naltirilgan professional xaridlar tizimini shakllantirishga o‘tish imkonini beradi.
