Toshkent, O’zbekiston (UzDaily.uz) — O‘zbekiston investitsiyalar, sanoat va savdo vaziri Laziz Qudratov 5 oktyabr kuni Yaponiya Xalqaro hamkorlik agentligi (JICA) katta vitse-prezidenti Katsura Miyadzaki bilan uchrashuv o‘tkazdi.
Tomonlar ikki tomonlama hamkorlikning joriy holati va istiqbollari, amalga oshirilayotgan qo‘shma loyihalarni bajarish jarayoni hamda yangi tashabbuslarni tayyorlash masalalarini ko‘rib chiqdilar.
Erkin iqtisodiy zonalarni (EIZ) rivojlantirishga alohida eʼtibor qaratildi.
Uchrashuv ishtirokchilari JICA tomonidan EIZlarning master-rejalarini tayyorlash, xorijiy investitsiyalarni, jumladan, Yaponiya kompaniyalari investitsiyalarini jalb qilish uchun sharoit yaratish borasida ko‘rsatilayotgan texnik ko‘makni yuqori baholadilar.
Muzokaralar yakunlari bo‘yicha tomonlar 2026–2030 yillarga mo‘ljallangan yangi Hamkorlik dasturini imzoladilar. Hujjat 15 ta istiqbolli loyihani amalga oshirishni nazarda tutadi.
Dastur doirasidagi tashabbuslar transport va energetika infratuzilmasini rivojlantirish, inson kapitalini rivojlantirish, sog‘liqni saqlash hamda qishloq xo‘jaligi sohalarini qamrab oladi.
