Toshkent, O’zbekiston (UzDaily.uz) — “O‘zto‘qimachiliksanoat” uyushmasi O‘zbekistonning amaldagi qonunchiligi to‘qimachilik korxonalari tomonidan mahsulot eksporti yoki eksport narxlarini uyushma bilan majburiy kelishishni nazarda tutmasligini maʼlum qildi. Bu haqda tashkilotning rasmiy bayonotida aytilgan.
“O‘zto‘qimachiliksanoat”da taʼkidlanishicha, uyushma O‘zbekiston Prezidentining 2017 yil 14 dekabrdagi PF-5285-sonli farmoni asosida tashkil etilgan.
Uyushma zimmasiga yuklatilgan vazifalar qatorida to‘qimachilik korxonalarini qo‘llab-quvvatlash, zamonaviy texnologiyalar va marketing vositalarini joriy etishga ko‘maklashish, shuningdek, mahalliy ishlab chiqaruvchilarning eksport salohiyatini xorijiy bozorlarda ilgari surish belgilangan.
Shu bilan birga, bayonotda taʼkidlanganidek, qonunchilikda to‘qimachilik korxonalari eksport faoliyatini amalga oshirish uchun “O‘zto‘qimachiliksanoat”ning alohida roziligi yoki kelishuvini olishi shartligi haqidagi norma mavjud emas. Eksport narxini uyushma bilan majburiy kelishish ham nazarda tutilmagan.
Qonunchilikka muvofiq, tadbirkorlik subyektlari tashqi iqtisodiy faoliyatni mustaqil ravishda amalga oshiradi. Xorijiy brendlar bilan ishlash shartlari, mahsulot qiymati va texnik talablar eksport qiluvchi korxona hamda xorijiy xaridor o‘rtasidagi tijorat kelishuvlari doirasida tomonlar tomonidan belgilanadi.
Uyushma xalqaro ko‘rgazmalar, B2B uchrashuvlar, eksport treninglari, xorijiy tashkilotlar bilan qo‘shma loyihalar va savdo missiyalari orqali ishlab chiqaruvchilarning tashqi bozorlarga chiqishini qo‘llab-quvvatlashini maʼlum qildi.
Shu munosabat bilan “O‘zto‘qimachiliksanoat” ijtimoiy tarmoqlarda tarqatilayotgan eksport faoliyatini kelishish zarurligi haqidagi xabarlarni uyushmaning belgilangan vakolatlariga muvofiq emas, deb atadi.
Tashkilotda, shuningdek, korrupsiyaning oldini olish va unga qarshi kurashish, shaffoflikni taʼminlash hamda qonuniylik tamoyillariga rioya etish bo‘yicha doimiy ishlar olib borilayotgani maʼlum qilindi.
“O‘zto‘qimachiliksanoat” o‘z faoliyati haqida axborot tarqatishda rasmiy va ishonchli manbalardan foydalanish, maʼlumotlarni tekshirish hamda xolislik tamoyillariga rioya etishga chaqirdi.
