Toshkent, O’zbekiston (UzDaily.uz) — Toshkent viloyati Yuqori Chirchiq tumanida energetika sohasi uchun zamonaviy uskunalar ishlab chiqarishga ixtisoslashgan NURA Electric yangi korxonasi ishga tushirildi. Bu haqda O‘zbekiston Energetika vazirligi xabar berdi.
Korxona Markaziy Osiyoda energetika sohasi uchun elektr kuch qurilmalarini ishlab chiqarish bo‘yicha yirik loyihalardan biriga aylandi.
Korxonaning ishga tushirilishi uskunalar va butlovchi qismlar ishlab chiqarishni mahalliylashtirish, sanoat kooperatsiyasini rivojlantirish hamda import o‘rnini bosuvchi mahsulotlarni o‘zlashtirish bo‘yicha amalga oshirilayotgan ishlar doirasida bo‘lib o‘tdi.
Ochilish marosimida O‘zbekiston Bosh vaziri o‘rinbosari Jamshid Xodjayev, Energetika vaziri Sherzod Xodjayev, energetika tizimi aksiyadorlik jamiyatlari rahbarlari, mahalliy ishlab chiqarish korxonalari vakillari hamda ommaviy axborot vositalari ishtirok etdi.
Korxonada elektrotexnika mahsulotlarining 1 500 turini ishlab chiqarish rejalashtirilmoqda. O‘rtacha mahalliylashtirish darajasini 60 foizga yetkazish ko‘zda tutilgan.
Ishlab chiqarishning yo‘lga qo‘yilishi 1 000 ta yangi ish o‘rni yaratish va ichki bozor uchun qo‘shilgan qiymati yuqori bo‘lgan mahsulotlar ishlab chiqarishni kengaytirish imkonini beradi.
Ishlab chiqariladigan mahsulotlar O‘zbekiston energetika sohasining ehtiyojlarini qondirish uchun ishlatiladi. Shuningdek, korxona mahsulotlarni MDH va Yevropa mamlakatlariga eksport qilishni rejalashtirmoqda.
