Toshkent, O’zbekiston (UzDaily.uz) — O‘zbekistonda Golden Gate Ventures tomonidan Markaziy Osiyodan startap asoschilari uchun ikki yillik qo‘llab-quvvatlash dasturini ishga tushirish rejalashtirilmoqda.
Bu haqda fondning boshqaruv hamkori Maykl Lints ICT WEEK Uzbekistan 2026 doirasida maʼlum qildi.
Dastur O‘zbekistonda amalga oshiriladi va 20 nafar startap asoschisiga mo‘ljallangan. Ishtirokchilar mentorlik ko‘magidan hamda Osiyo, Yaqin Sharq, AQSH va Yevropadan tadbirkorlarni birlashtiruvchi Golden Gate Ventures xalqaro hamjamiyatiga kirish imkoniyatidan foydalanadi.
Dasturning asosiy vazifalaridan biri kompaniyalarni rivojlantirish va ularning xalqaro bozorlarga chiqishiga ko‘maklashishdan iborat bo‘ladi. Qo‘llab-quvvatlash formati ishtirokchilarning tadbirkorlar va fondning xalqaro startap ekotizimi vakillari bilan o‘zaro hamkorligini nazarda tutadi.
Maykl Lintsning so‘zlariga ko‘ra, Golden Gate Ventures yaqinda Toshkentda o‘z ofisini ochgan. Dasturni rasman ishga tushirishni IT Park Uzbekistan bilan hamkorlikda o‘tkazish rejalashtirilmoqda.
Ishtirokchilarga qo‘yiladigan aniq talablar, arizalarni qabul qilish muddatlari va saralash tartibi hozircha eʼlon qilinmagan.
