Toshkent, O’zbekiston (UzDaily.uz) — Global Textile to‘qimachilik korxonalari guruhi va Amerikaning Make American Cotton Great Again (MACGA) tashkiloti 35 million dollarlik o‘zaro anglashuv memorandumini imzoladi.
Hujjat Samarqand shahrida O‘zbekiston, Markaziy Osiyoning boshqa mamlakatlari va AQSH ishtirokidagi C5+1 formatidagi vazirlar uchrashuviga bag‘ishlangan tadbirlar doirasida imzolandi.
Uchrashuv doirasida Farg‘ona viloyati hokimining o‘rinbosari Islomjon Madaminov boshchiligidagi viloyat delegatsiyasi Amerika kompaniyalari va tashkilotlari vakillari bilan muzokaralar o‘tkazdi.
Muhokamalarda Make American Cotton Great Again, Honeywell International, Integrated Global Services (IGS), Air Products, Siguler Gulf, ITF Group va Logan University vakillari ishtirok etdi.
Muzokaralarga, shuningdek, Farg‘ona neftni qayta ishlash zavodi, “Kvars” AJ va Global Textile korxonasi rahbarlari ham qo‘shildi.
Tomonlar neftni qayta ishlash zavodida yangi texnologiyalarni joriy etish va ishlab chiqarish jarayonlarini avtomatlashtirish, sanoat uskunalarini korroziyadan himoya qilish hamda shisha ishlab chiqarishning energiya samaradorligini oshirish imkoniyatlarini ko‘rib chiqdi.
Jumladan, tabiiy gaz sarfini kamaytirish maqsadida shisha eritish pechlarida kislorod-yoqilg‘i texnologiyasini (oxy-fuel) qo‘llash masalasi muhokama qilindi.
To‘qimachilik sohasidagi hamkorlikni rivojlantirishga ham alohida eʼtibor qaratildi. Muzokaralar davomida bir qator yo‘nalishlar bo‘yicha kelishuvlarga erishildi.
MACGA va Global Textile o‘rtasida memorandumning imzolanishi Farg‘ona viloyatining Amerika hamkorlari bilan ishbilarmonlik aloqalarini kengaytirish va qo‘shma loyihalarni rivojlantirishga qaratilgan uchrashuvlarning aniq natijalaridan biri bo‘ldi.
