Toshkent, O’zbekiston (UzDaily.uz) — O‘zbekistonda 2026 yilning yanvar–avgust oylarida 4,4 trln so‘mlik asosiy farmatsevtika mahsulotlari va preparatlari ishlab chiqarildi. Ishlab chiqarishning fizik hajmi o‘tgan yilning shu davriga nisbatan 24,9 foizga oshdi. Bu haqda Milliy statistika qo‘mitasi xabar berdi.
Ishlab chiqarishning eng katta hajmi Toshkent shahri hissasiga to‘g‘ri keldi. Bu yerda sakkiz oy davomida 2,4 trln so‘mlik farmatsevtika mahsulotlari ishlab chiqarildi.
Sirdaryo viloyatida ishlab chiqarish hajmi 913,7 mlrd so‘mni, Toshkent viloyatida 332,5 mlrd so‘mni tashkil etdi. Namangan viloyatida ushbu ko‘rsatkich 256,5 mlrd so‘mga, Samarqand viloyatida esa 167,6 mlrd so‘mga yetdi.
Andijon viloyatida 92,6 mlrd so‘mlik, Farg‘ona viloyatida 67,7 mlrd so‘mlik, Surxondaryo viloyatida esa 65,2 mlrd so‘mlik farmatsevtika mahsulotlari ishlab chiqarildi.
Xorazm viloyatida ishlab chiqarish hajmi 21,7 mlrd so‘mni, Qashqadaryo viloyatida 20,3 mlrd so‘mni, Buxoro viloyatida esa 11,2 mlrd so‘mni tashkil qildi.
Qoraqalpog‘iston Respublikasida 4 mlrd so‘mlik farmatsevtika mahsulotlari ishlab chiqarildi. Navoiy viloyatida ushbu ko‘rsatkich 0,3 mlrd so‘mni, Jizzax viloyatida esa 0,1 mlrd so‘mni tashkil etdi.
