FIFA O‘zbekistonning JCHdagi debyutini sarhisob qildi

Toshkent, O’zbekiston (UzDaily.uz) — Xalqaro futbol federatsiyasi (FIFA) 2026 yilgi jahon chempionatida O‘zbekiston terma jamoasining ishtirokini sarhisob qilib, milliy jamoaning sayyoramizning eng yirik futbol musobaqasidagi ishtirokini tarixiy debyut deb atadi.

FIFA eʼlon qilgan sharhda qayd etilishicha, O‘zbekiston terma jamoasi musobaqani guruh bosqichida yakunlagan bo‘lsa-da, jahon chempionatidagi ilk ishtirok milliy futbol tarixida muhim bosqich bo‘ldi.

Federatsiya yarim himoyachi Abbosbek Fayzullayevni alohida eʼtirof etdi. U Kolumbiya darvozasiga gol kiritib, O‘zbekiston terma jamoasining jahon chempionatlari tarixidagi ilk goliga muallif bo‘ldi. Shuningdek, Eldor Shomurodovning Kongo Demokratik Respublikasi terma jamoasiga qarshi uchrashuvda urgan goli Hyundai ko‘magida tashkil etilgan ovoz berish yakunlariga ko‘ra, guruh bosqichining eng yaxshi goli deb topildi.

FIFA bahosiga ko‘ra, Fabio Kannavaro boshchiligidagi jamoa musobaqa davomida texnikaga asoslangan futbol va yuqori fidoyilikka tayanuvchi o‘z o‘yin uslubiga sodiq qoldi. Shu bilan birga, tashkilot musobaqa davomida futbolchilar uchun o‘yinlarning yuqori surʼatini saqlab qolish tobora qiyinlashib borganini ham taʼkidladi.

Sharhda yosh futbolchilarga, jumladan 18 yoshli Behruz Karimovga alohida eʼtibor qaratildi.

FIFA taʼkidlashicha, jahon chempionatida ishtirok etish yosh futbolchilarga eng yuqori darajadagi musobaqalarda qimmatli tajriba orttirish imkonini berdi. Bu tajriba terma jamoaga to‘rt yildan keyingi navbatdagi jahon chempionatigacha rivojlanish yo‘lidagi navbatdagi qadamni tashlashga yordam berishi kutilmoqda.