Toshkent, O’zbekiston (UzDaily.uz) — Toshkent shahar hokimligi poytaxt Ichki ishlar bosh boshqarmasiga Chilonzor tumanida fuqarolarga xizmat ko‘rsatish markazi qurish uchun 0,08 gektar yer maydoni ajratdi. Tegishli qaror E-qaror platformasida eʼlon qilindi.
Yer maydoni “Qozirabod” mahallasi hududida, Kichik halqa yo‘li bo‘ylab 16 va 52/2-uylar oralig‘ida joylashgan.
Ochiq maʼlumotlarga ko‘ra, gap “Chilonzor” metro bekati yaqinida joylashgan, KFC restorani va boshqa obyektlar mavjud bo‘lgan tijorat binosi, shuningdek, undan janubi-sharqqa tomon taxminan 700 metr masofada, Korzinka do‘koni yaqinida joylashgan SSKI binosi haqida bormoqda.
Yangi markazda migratsiya, yo‘l harakati xavfsizligi va probatsiya bilan bog‘liq xizmatlarni tezkor taqdim etish rejalashtirilmoqda. Muassasa Ichki ishlar organlari faoliyatini muvofiqlashtirish bo‘yicha Chilonzor boshqarmasi tarkibida ishlaydi.
Toshkent shahar Ichki ishlar bosh boshqarmasiga yer maydoni hududining topografik xaritasi va geologik xulosasini tayyorlash bo‘yicha buyurtma joylashtirish topshirildi.
Shundan so‘ng boshqarma loyiha tashkiloti bilan shartnoma tuzishi va ishlab chiqilgan hujjatlarni tasdiqlash uchun taqdim etishi kerak.
Qaror ijrosini nazorat qilish Toshkent shahar hokimining qurilish, to‘siqsiz muhit yaratish, kommunikatsiyalarni rivojlantirish, ekologiya va ko‘kalamzorlashtirish masalalari bo‘yicha birinchi o‘rinbosari Baxtiyor Raxmonov zimmasiga yuklatildi.
