Toshkent, O’zbekiston (UzDaily.uz) — 2026 yil 1 sentyabr holatiga ko‘ra, O‘zbekistonda xorijiy investitsiyalar ishtirokidagi 21 490 ta korxona va tashkilot faoliyat yuritgan.
Bunday korxonalarning eng ko‘pi Xitoy bilan bog‘liq bo‘lib, ularning soni 6 436 tani tashkil etgan. Bu haqda O‘zbekiston Respublikasi Milliy statistika qo‘mitasi xabar berdi.
Jami korxonalarning 4 758 tasi qo‘shma korxonalar, 16 732 tasi esa xorijiy kapital ishtirokidagi korxonalar hisoblanadi.
So‘nggi besh yilda O‘zbekistonda xorijiy investitsiyalar ishtirokidagi faoliyat yuritayotgan korxonalar soni 1,7 barobarga oshgan. Shu bilan birga, bunday kompaniyalar tarkibi ham sezilarli darajada o‘zgargan: xorijiy kapital ishtirokidagi korxonalar ulushi 56,2 foizdan 77,9 foizga ko‘tarilgan.
Xitoy xorijiy investitsiyalar ishtirokidagi korxonalar soni bo‘yicha davlatlar orasida birinchi o‘rinni egallaydi. 1 sentyabr holatiga ko‘ra, O‘zbekistonda Xitoy kapitali ishtirokidagi 6 436 ta korxona faoliyat yuritgan.
Ikkinchi o‘rinda 3 589 ta korxona bilan Rossiya qayd etilgan. Uchinchi o‘rinni esa 2 365 ta korxona bilan Turkiya egallagan.
Xorijiy investitsiyalar ishtirokidagi korxonalar soni eng ko‘p bo‘lgan davlatlar qatoriga shuningdek Qozog‘iston, Janubiy Koreya, Afg‘oniston, Ozarbayjon, Tojikiston, Birlashgan Arab Amirliklari va Hindiston kiradi.
Jumladan, O‘zbekistonda Qozog‘iston kapitali ishtirokida 1 345 ta, Janubiy Koreya kapitali ishtirokida 739 ta, Afg‘oniston kapitali ishtirokida 725 ta korxona faoliyat yuritmoqda. Ozarbayjon 503 ta, Tojikiston 483 ta, BAA 464 ta, Hindiston 446 ta korxona bilan qayd etilgan.
Shunday qilib, ro‘yxatda keltirilgan o‘nta davlat hissasiga xorijiy investitsiyalar ishtirokidagi 17 094 ta korxona to‘g‘ri keladi.
Shu bilan birga, Xitoy kompaniyalari xorijiy kapital ishtirokidagi korxonalar orasida eng yirik guruhni tashkil etmoqda.
