AQSh jamoasi WR Chess Miami 2026 musobaqasida O'zbekistonni mag'lub etdi
Toshkent, O’zbekiston (UzDaily.uz) — AQSH terma jamoasi WR Chess Miami Rapid & Blitz 2026 birinchi jamoaviy turnirida O‘zbekiston terma jamoasi ustidan g‘alaba qozondi. Amerikalik shaxmatchilar uchrashuv tugashiga bir tur qolganidayoq g‘alabani muddatidan oldin taʼminladi, hal qiluvchi so‘nggi tur esa durang bilan yakunlandi. Qarshilikning yakuniy hisobi 14:10 bo‘ldi.
AQSH terma jamoasi safida Fabiano Karuana, Levon Aronyan, Uesli So, Xikaru Nakamura va Lenyer Dominges ishtirok etdi. O‘zbekiston jamoasi tarkibida Javohir Sindarov, Nodirbek Abdusattorov, Nodirbek Yoqubboyev, Shamsiddin Vohidov va Muhiddin Madaminov o‘ynadi.
Musobaqaning rapiddagi birinchi kunidan keyin AQSH jamoasi 5:3 hisobida oldinda bordi. Ikkinchi kuni amerikaliklar blisda ham 9:7 hisobida g‘alaba qozonib, umumiy natijani o‘z foydasiga hal qildi.
Uchrashuv davomida O‘zbekiston jamoasi raqibiga jiddiy qarshilik ko‘rsata oldi. Beshinchi turdan keyin umumiy hisob tenglashdi — 9:9. Biroq amerikalik shaxmatchilar oltinchi va yettinchi turlarda g‘alaba qozonib, uchrashuv yakuniga yetmasdanoq umumiy g‘alabani taʼminladi.
Turnirning eng yorqin lahzalaridan biri Nodirbek Abdusattorovning birinchi blis turida Xikaru Nakamura ustidan qozongan g‘alabasi bo‘ldi. Uning g‘alabasi O‘zbekistonga uchrashuvdagi muvozanatni tiklash imkonini berdi — 5:5. Keyinchalik Nakamura revansh olishga muvaffaq bo‘ldi.
Javohir Sindarov Nakamurani ikki marta mag‘lub etdi, Nodirbek Yoqubboyev va Abdusattorov esa Fabiano Karuana hamda Levon Aronyan ustidan g‘alaba qozonib, qarama-qarshilikdagi intrigani so‘nggi bosqichga qadar saqlab qoldi. Shunga qaramay, hal qiluvchi partiyalarda Karuana, So, Aronyan va Nakamuraning g‘alabalari AQSH terma jamoasiga umumiy g‘alabani keltirdi.
Uchrashuvdan so‘ng Nodirbek Abdusattorov aynan jamoaviy format shaxmatni ayniqsa tomoshabop qilishini taʼkidladi.
«Menga jamoaviy musobaqalarda deyarli zerikarli duranglar bo‘lmasligi yoqadi. Hamma oxirigacha kurashadi, shuning uchun har doim qiziqarli partiyalarni ko‘rish mumkin», — dedi u.
O‘zbekistonlik grossmeysterning so‘zlariga ko‘ra, milliy jamoaning asosiy ustunligi do‘stlik va kuchli jamoaviy ruh bo‘lib qolmoqda.
Xikaru Nakamura uchrashuv natijasini sharhlar ekan, amerikalik jamoa yo‘l qo‘yilgan xatolarga qaramay, hal qiluvchi pallalarda o‘zining eng yaxshi o‘yinini ko‘rsata olganini aytdi. Uesli So esa O‘zbekiston terma jamoasining saviyasiga yuqori baho berib, ayniqsa Javohir Sindarov va Nodirbek Abdusattorovning salohiyatini alohida qayd etdi.
Turnir tashkilotchilari kurashning yuqori saviyada o‘tganini taʼkidlab, ikki jamoa o‘rtasidagi bunday yorqin qarama-qarshilikni muxlislar sentyabr oyida Samarqandda bo‘lib o‘tadigan Jahon shaxmat olimpiadasida ham ko‘rishlariga umid bildirishdi.
