Andijon viloyatida yer uchastkasi bilan bog‘liq firibgarlik fosh etildi

Toshkent, O’zbekiston (UzDaily.uz) — Andijon viloyatida huquqni muhofaza qiluvchi organlar davlat yer fondidagi yer uchastkasini pul evaziga rasmiylashtirib berish vaʼdasi bilan bog‘liq noqonuniy sxemaning oldini oldi.

Tergov maʼlumotlariga ko‘ra, Marhamat tumanidagi bank xizmatlari markazlaridan birining rahbari “Norin–Qoradaryo” irrigatsiya tizimlari havza boshqarmasi mashinisti bilan til biriktirgan.

Ular 1989 yilda tug‘ilgan fuqaroni chalg‘itib, Marhamat tumani hokimligi zaxirasida bo‘lgan 24 sotix yer uchastkasi go‘yoki yakka tartibda uy-joy qurish uchun mo‘ljallangan yerlar toifasiga o‘tkazish uchun hujjatlari allaqachon rasmiylashtirilgani haqida xabar bergan.

Gumonlanuvchilar o‘zlarining tanish mansabdor shaxslari orqali yer uchastkasini fuqaro nomiga rasmiylashtirib berishni vaʼda qilgan va buning uchun 39 ming AQSH dollari talab qilgan.

Davlat xavfsizlik xizmati xodimlari Iqtisodiy jinoyatlarga qarshi kurashish departamenti va ichki ishlar organlari bilan hamkorlikda o‘tkazgan tezkor tadbir davomida mashinist 25 ming dollar miqdorida avans olayotgan vaqtida ashyoviy dalillar bilan ushlangan.

Pul mablag‘lari ashyoviy dalil sifatida olib qo‘yilgan.

Mazkur holat yuzasidan jinoiy ish qo‘zg‘atildi. Ayni vaqtda tergov harakatlari olib borilmoqda.