Toshkent, O’zbekiston (UzDaily.uz) — Andijon viloyati hokimi Shuhratbek Abdurahmonov boshchiligidagi delegatsiya Belarus Respublikasining Vitebsk viloyatiga tashrif buyurdi. Ishchi tashrif davomida tomonlar taʼlim, qishloq xo‘jaligi va qo‘shma investitsiya loyihalarini amalga oshirish sohalaridagi hamkorlik istiqbollarini muhokama qilmoqda.
Tashrif dasturi Vitebsk shahrini ozod qilishda halok bo‘lgan o‘zbekistonlik jangchilar xotirasiga bag‘ishlangan yodgorlik belgisining ochilish marosimida ishtirok etish bilan boshlandi.
Marosimda Andijon viloyati delegatsiyasi vakillari, Vitebsk viloyati ijroiya qo‘mitasi raisi Aleksandr Rogojnik va O‘zbekistonning Belarusdagi elchisi ishtirok etdi.
Tadbir qatnashchilari halok bo‘lganlar xotirasini yod etib, memorialga gullar qo‘ydi. Unda 17,9 mingdan ortiq jangchining ismi abadiylashtirilgan bo‘lib, ular orasida O‘zbekistonda tug‘ilgan 700 nafardan ziyod harbiy xizmatchi ham bor. Ularning qariyb 50 nafari Andijon viloyatidan bo‘lgan.
Taʼlim sohasidagi hamkorlik
Tashrif doirasida delegatsiya Vitebsk davlat universitetiga borib, taʼlim jarayonining tashkil etilishi, ilmiy faoliyat va oliy taʼlim muassasasining imkoniyatlari bilan tanishdi.
Muzokaralarda ikki hudud taʼlim muassasalari o‘rtasidagi hamkorlikni kengaytirish, o‘qitish sifatini oshirish maqsadida tajriba almashish, o‘qituvchilar va talabalarning akademik mobilligini rivojlantirish istiqbollari ko‘rib chiqildi. Shuningdek, qo‘shma taʼlim dasturlari va ilmiy-tadqiqot loyihalarini amalga oshirish masalalari muhokama qilindi.
Shuhratbek Abdurahmonov Vitebsk davlat universitetida tahsil olayotgan, Belarusda stajirovka o‘tayotgan yoki malakasini oshirayotgan Andijon viloyatidan chiqqan yoshlar bilan uchrashdi. U ularning taʼlim olish va yashash sharoitlari, duch kelayotgan qiyinchiliklari hamda takliflari bilan qiziqdi.
Talabalarni qo‘llab-quvvatlash va ularning kasbiy kompetensiyalarini rivojlantirish uchun zarur sharoitlarni yaratish masalalariga alohida eʼtibor qaratildi.
Qishloq xo‘jaligida qo‘shma loyihalar
Muzokaralarning yana bir yo‘nalishi agrar sohadagi hamkorlik bo‘ldi. Vitebsk viloyatining Ushachi tumanida O‘zbekistonlik investorlar ishtirokida yirik shoxli qoramol yetishtirishni rivojlantirishni rejalashtirayotgan «Andijan mayak» masʼuliyati cheklangan jamiyati tashkil etilgan.
Aleksandr Rogojnik va Shuhratbek Abdurahmonov tumanga tashrif buyurib, mazkur tashabbusni amalga oshirish istiqbollarini muhokama qildi. Kutilishicha, loyiha ikki hududning agrar salohiyatini birlashtirish, tajriba almashish va investitsiyaviy hamkorlikni kengaytirishga xizmat qiladi.
Tashrif Andijon va Vitebsk viloyatlari o‘rtasidagi aloqalarni mustahkamlash, taʼlim va ilm-fan sohalaridagi hamkorlikni rivojlantirish, yoshlarni qo‘llab-quvvatlash hamda qo‘shma iqtisodiy tashabbuslarni ilgari surishga qaratilgan.
